Sirr deyil ki, çoxları internetdə mütəmadi olaraq sevimli dostlarımızın, ələlxüsus da pişiklərin videolarına baxırlar. Şən və pozitiv ovqat bəxş etməklə yanaşı, stresi azaltmağa kömək edən bu videoçarxlar insanları gündəlik gərginlikdən az da olsa uzaqlaşdırır. Son zamanlar Bakı küçələrində də çəkilən belə video və şəkillər diqqəti cəlb edir. Ümumiyyətlə, Bakı sakinləri hər zaman pişikləri çox sevib və onlara qayğı göstəriblər. Gəzinti zamanı, parklarda, yol kənarlarında hər zaman tumarlayıb, yemləyiblər.
Bu günlərdə, havalar hələ xoşkən vətəndaşlar daha çox piyada gəzişirlər. Əvvəllər, gərgin həyat ritmində diqqətdən kənar qalan detallara indi fikir verirlər. Bu günlərdə, İçəri Şəhər metrosu yaxınlığında bir sarı pişik xüsusilə diqqətimizi çəkdi. Qızıl rəngə çalan sarı xəzli pişik, səkidə, yolun ortasında, əhvalını pozmadan, məkanın tamhüquqlu sahibi kimi uzanmışdı. Gəlib-gedənlər, işə, məktəbə tələsənlər və ya sadəcə gəzintiyə çıxan sakinlər onu tumarlayır, o isə sakitcə uzanıb, xoş havanın dadını çıxarırdı.
Bir qadın yanından tez keçsə də, sonra ayaq saxlayıb geri qayıtdı və yaxında kiçik bir marketdən pişik yemi alıb həmin qızılı pişiyi səslədi. Pişik yeməyi yedi, sonra Bakı Şəhər İcra Hakimiyyətinin binası önündə özünü nazlana-nazlana günəşə verməyə davam etdi. Onun bu ədası özünəməxsus bir görüntü yaradaraq keçənlərdə “İcranın pişiyi belə olar da” birmənalı qənaətini yaratmış oldu…