Sabunçu rayonunun Zabrat 2 qəsəbəsində qəbiristanlığın bir hissəsi kanalizasiya suları altında qalıb. Sakinlər problemin 1 həftədir davam etdiyini, aidiyyəti qurumların isə əraziyə baxış keçirmədiyini bildirirlər.
Məsələ ilə bağlı İri Şəhərlərin Birləşmiş Su Təchizatı Xidmətindən Baki-baku.az-ın sorğusuna cavab olaraq bildirildi ki, sözügedən ərazidə İri Şəhərlərin Su Təchizatının mərkəzləşdirilmiş tullantı su şəbəkəsi mövcud deyil.
“Ərazidə məskunlaşan vətəndaşlar primitiv formada çəkdikləri xətlərlə tullantı sularını həmin bataqlıq əraziyə axıdırlar. Nəticədə qəbiristanlıqda belə bir hal müşahidə edilir. Hazırda Sabunçu Sukanal İdarəsi rayon bələdiyyəsi ilə birlikdə ərazinin tullantı sulardan təmizlənməsi istiqamətində işlər görürlər. Məsələnin köklü həlli istiqamətində layihə sənədləri hazırlanıb, baxış mərhələsindədir”, – deyə məlumatda qeyd olunub.
