Oktyabrın 1-dən 5-dək Şəkidə V Şəki Beynəlxalq Teatr Festivalı keçiriləcək. Şəki Dövlət Dram Teatrının Repertuar və dramaturgiya üzrə mütəxəssisi Lalə Məmmədova bildirib ki, Şəki şəhəri növbəti dəfə müxtəlif ölkələrin teatr kollektivlərini bir araya gətirəcək. Onun sözlərinə görə, Şəki Beynəlxalq Teatr Festivalının zəngin və özünəməxsus tarixi var. 2014-cü ildən etibarən keçirilən festival Azərbaycan teatr tarixində ənənəvi olan ilk beynəlxalq dramatik teatrlar festivalı kimi qeyd olunur.
Baki-baku.az xəbər verir ki, Festivalın ilkin dövründə Qazaxıstan, Rusiya və Azərbaycan teatrları iştirak edib. II Şəki Beynəlxalq Teatr Festivalında Türkiyə, Birləşmiş Ərəb Əmirlikləri, İran, Ukrayna, Gürcüstan, Rusiya və Azərbaycan, III festivalda Türkiyə, Meksika, İran, Gürcüstan, Rusiya və Azərbaycan, IV festivalda isə Qazaxıstan, Özbəkistan, Türkiyə və Azərbaycan teatrları müxtəlif janrlarda tamaşalar təqdim ediblər.
Şəki Dövlət Dram Teatrında mütəmadi olaraq keçirilən beynəlxalq teatr festivallarının əsas məqsədi Azərbaycan və dünya teatrları arasında yaradıcılıq əlaqələrinin inkişaf etdirilməsi, dostluq münasibətlərinin möhkəmləndirilməsi, təcrübə mübadiləsinin aparılması, eləcə də əməkdaşlıq memorandumları və müqavilələrin imzalanmasıdır.
Qeyd edək ki, Azərbaycan Respublikası Mədəniyyət Nazirliyi, Şəki Şəhər İcra Hakimiyyəti, Azərbaycan Teatr Xadimləri İttifaqı və Şəki Dövlət Dram Teatrının birgə təşkilatçılığı ilə keçiriləcək V Şəki Beynəlxalq Teatr Festivalında Azərbaycan teatrları ilə yanaşı, Qazaxıstan, Özbəkistan və İranın teatr kollektivləri də iştirak edəcəklər.
Festival çərçivəsində təqdim olunacaq tamaşaların teatrsevərlərə müxtəlif ölkələrin səhnə sənəti və yaradıcılıq ənənələri ilə tanış olmaq imkanı yaradacağı gözlənilir.
