Xəbər verdiyimiz kimi, əldə etdiyimiz məlumata görə, avtomobillər üçün yeni dövlət qeydiyyat nişanlarının çipsiz verilməsinə başlanıb. Artıq vətəndaşlar sosial şəbəkələrdə əldə etdikləri çipsiz nömrələri paylaşırlar.

İstifadə olunan çipli nömrələr avtomobillərə nəzarət, hər hansı hadisə baş verərsə avtomobillərin tapılması və təhlükəsizlik baxımından rol oynayırdı. Bəs çipsiz nömrələrə keçid bu prosesə necə təsir edəcək?

Mövzu ilə əlaqədar Baki-baku.az-a fikirlərini bölüşən nəqliyyat üzrə ekspert Elməddin Muradlı bildirib ki, bu, əslində texniki məsələdir: “Avtomobil nömrələrində çip müəyyən edilən standartlar əsasında qoyulurdu. Görünür, həmin dövr bunu tələb edirdi. Artıq hər yerdə kamera var, radar sistemləri var. Bunun vasitəsilə avtomobillərin təhlükəsizliyinə nəzarət etmək mümkündür. Bu səbəbdən düşünürəm ki, avtomobillər üçün yeni dövlət qeydiyyat nişanlarında çipin qoyulmasının əhəmiyyəti yoxdur. Hələ ki, çipsiz nömrələrə keçidlə bağlı rəsmi açıqlama da yoxdur”.

Qeyd edək ki, artıq 14 ildir ki, (21 noyabr 2011 – oktyabr 2025) çipli nömrələrin satışı həyata keçirilir. Yeni dövlət qeydiyyat nişanları isə indi çipsiz verilir.

Vətəndaşlar köhnə avtomobil nömrələrini dəyişib, çipsiz yeni nömrə ilə əvəzləyə bilərlər.