Bakının mərkəzində Nəsimi rayonu, Vidadi küçəsi 107 ünvanında Dövlət tərəfindən qorunulan, yerli əhəmiyyətli memarlıq abidəsi hesab olunan, 1907-ci ilə aid bina tullantıların mərkəzinə çevrilib.

Baki-baku.az xəbər verir ki, binada təmir işləri aparan sakin tullantıları binanın daxili həyətinə toplayıb. Təmir bitdiyi halda tullantılar kənarlaşdırılmayıb.

Sakinlər bildirir ki, bu vəziyyət artıq 1 aydır davam edir. Qeyd olunub ki, aidiyyəti qurumlara müraciət olunsa da, heç bir tədbir görülməyib.

Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinə müraciət ünvanladıq.

Bildirildi ki, Xidmətin əməkdaşları əraziyə gedərək binanın həyətinə baxış keçiriblər. Aparılan danışıqdan sonra sakin tullantıların bir neçə gün ərzində ərazidən kənarlaşdırılmasına dair öhdəlik götürüb. Məsələ nəzarətdə saxlanılır.