Bakıda şəhərsalma istiqamətində həyata keçirilən inkişaf prosesləri bizdə böyük təəssürat yaratdı. Hesab edirəm ki, bu modeldən faydalanılası və nümunə götürüləsi bir çox məqam mövcuddur. Şəhərin bu qədər sürətli və uğurlu transformasiyası bizim üçün də ilham mənbəyidir.

Baki-baku.az xəbər verir ki, bu fikirləri Konqonun infrastruktur və ictimai işlər üzrə dövlət naziri Aleksis Gisaro Muvunyi səsləndirib.

Nazir forumun xüsusilə şəhərsalma sahəsində uğur əldə etmiş ölkələrin təcrübəsini öyrənmək baxımından mühüm əhəmiyyət daşıdığını vurğulayıb.

“Bu tədbirdən gözləntimiz yalnız təcrübə mübadiləsi aparmaq deyil, eyni zamanda Konqo Demokratik Respublikası haqqında məlumat vermək, investorların diqqətini ölkəmizə cəlb etmək və Afrikanın investisiya üçün böyük potensiala malik bir qitə olduğunu nümayiş etdirməkdir.

Ümid edirik ki, həm beynəlxalq tərəfdaşlarla, həm də özəl sektor nümayəndələri ilə Konqo və ümumilikdə Afrika barədə geniş fikir mübadiləsi aparmaq imkanı əldə edəcəyik və nəticədə həmin regionlara investisiyaların yönəldilməsinə maraq artacaq”, – deyə Aleksis Gisaro Muvunyi qeyd edib.