Bakının Səbail rayonunda, Şeyx Şamil küçəsində Formula 1 Azərbaycan Qran-prisi yarışı zamanı quraşdırılan yol nişanlarından birinin yarış başa çatdıqdan sonra aşmış vəziyyətdə ərazidə qalması diqqət çəkib.

Baki-baku.az xəbər verir ki, söhbət hazırda qüvvədə olmayan yol hərəkəti nişanından gedir. Sakinlər bildirirlər ki, sözügedən yol nişanı hazırda qüvvədə olmadığı üçün yerə aşırılıb və dirəyi ilə birlikdə səkidə qalıb. Nişanın bu vəziyyətdə uzun müddət ərazidə qalması həm küçənin görünüşü, həm də piyadaların hərəkəti baxımından sual yaradıb.

Məsələ ilə bağlı Bakı Şəhər Halqası Əməliyyat Şirkətinə müraciət etdik.

Şirkətdən bildirildi ki, hazırda demontaj işləri davam etdirilir, sözügedən yol nişanı qısa zamanda ərazidən götürüləcək.

Şəhərdə müxtəlif tədbirlər və yarışlar zamanı müvəqqəti quraşdırılan yol nişanları, baryerlər və digər konstruksiyaların tədbirdən sonra vaxtında ərazidən götürülməsi isə küçələrin əvvəlki vəziyyətinə qaytarılması, sakinlərin rahatlığı baxımından əhəmiyyətlidir.