Elektron siqaretlər ənənəvi siqaretdən daha çox koqnitiv qabiliyyətləri azaldır. Ancaq beyin sağlamlığı üçün ən təhlükəlisi bu iki pis vərdişin birləşməsidir.
Baki-baku.az xəbər verir ki, bunu Ekvadorun Katolik Universitetinin alimləri aşkar ediblər.
Məlumata görə, tədqiqatda 405 ispanəsilli tələbə iştirak edib. Onlara Monreal Koqnitiv Qiymətləndirməsini (MoCA) tamamlamaq tapşırılıb. Bu, koqnitiv pozğunluğu yoxlamaq üçün geniş istifadə olunur və testdəki suallar yaddaş, vizual məkan qabiliyyətləri, dil və abstrakt təfəkkür, icra funksiyaları, diqqət, zaman və məkanda oriyentasiyanın qiymətləndirilməsinə yönəldilib.
Nəticələr göstərib ki, nə adi, nə də elektron siqaret çəkməyən tələbələr orta hesabla 26 MoCA balı toplayıblar. Elektron siqaretdən istifadə edən iştirakçılar 24, adi siqaret çəkənlər 25 bal alıblar. Koqnitiv sağlamlığın ən aşağı göstəricilərini həm elektron, həm də adi siqaretdən istifadə edən tələbələr nümayiş etdiriblər.