Yay aylarında Bakı qızmar günəşin işığına, isti havaya və özünəməxsus cənub ab-havasına bürünür. Daş binaların divarları günün istisini özünə çəkir, asfalt günəş şüaları altında parıldayır, küçələr isə sanki axşam sərinliyinin düşməsini gözləyir. Məhz belə isti günlərdə fəvvarələr təravət bəxş edən məkanlara çevrilir.
Fəvvarəyə yaxınlaşan kimi havanın dəyişdiyini hiss edirsən. Su şırnaqları yuxarı qalxır, şəffaf damcılara bölünərək yavaş-yavaş aşağı enir. Yüngül külək su damcılarının zərrəciklərini ətrafa yayır, isti bir anlıq yoxa çıxır, maşınların səsi isə suyun sakit şırıltısına qarışaraq sanki yox olur.
Fəvvarələr artıq uzun illərdir Bakının simasının ayrılmaz hissəsidir. Onlar meydanları, parkları, bağları və piyadaların sevimli küçələrini bəzəyir. Fəvvarələr meydanı isə paytaxtın ən canlı və hərəkətli məkanlarından biri kimi xüsusi yer tutur. Burada kimisi işi dalınca tələsir, kimsə kafedə dincəlir, digəri də bir qədər nəfəs almaq üçün suyun kənarında dayanır.
Bakı bulvarındakı fəvvarələrin də özünəməxsus gözəlliyi var. Burada suyun sərinliyi Xəzərdən gələn küləklə birləşir. İsti yay günündə dəniz, külək və sərin su damcıları insana rahatlıq duyğusu bəxş edir. Skamyada əyləşmək, ağacların xışıltısını dinləmək və şəhərin bir neçə dəqiqəlik sakitləşməsini seyr etmək istəyirsən.
Fəvvarələrin ətrafında daim ailələrin istirahət etdiyini görmək mümkündür. Uşaqlar gülür, dəyişən su şırnaqlarını maraqla izləyir və damcıları əlləri ilə tutmağa çalışırlar. Böyüklər kölgədə dincəlir, turistlər isə şəhər mənzərəsi fonunda yaranan su görüntülərinin şəkillərini çəkirlər.
Fəvvarələr axşam saatlarında xüsusilə gözəl görünür. Parlayan gecə işıqları suya müxtəlif rəng çalarları verir, su şırnaqları bir-birini əvəz edərək canlı naxışlar yaradır. Hava sərinləşir, şəhərin işıqları yanır və küçələr yenidən insanlarla dolur.
Yay aylarında Bakı üçün fəvvarə sadəcə bəzək deyil. O, istidən qorunmaq, suyun sakitləşdirici səsini dinləmək və bir müddət şəhərin səs-küyünü unutmaq üçün gözəl məkandır. Fəvvarələr sanki şəhərə ikinci nəfəs verir, isti günü daha yüngül, gəzintini isə daha xoş edir.
Hacı Cavadov
