Oktyabrın 24-də Bakı Mərkəzi Nəbatat Bağında Sofiya Frankın kuratorluğu ilə “Torpaq” adlı qrup sərgisi açılacaq.
Layihədə rəssamlar Cəbrayıl Quliyev, Ramil Əliyev, Emin Mathers, Nərgiz Ramizqızı və Ceyhun İmanov iştirak edəcəklər. Sərgi Azərbaycan Respublikası Mədəniyyət Nazirliyinin dəstəyi ilə keçirilir və 2026-cı il noyabrın 21-dək davam edəcək.
Baki-baku.az xəbər verir ki, “Torpaq” bitki aləmi metaforası vasitəsilə miqrasiya, assimilyasiya və yeni vətən axtarışı mövzularına müraciət edir. Layihənin başlanğıc nöqtəsi Bakı Mərkəzi Nəbatat Bağıdır. Bura dünyanın müxtəlif guşələrindən gətirilmiş bitkilərin yeni iqlim şəraitinə uyğunlaşdığı, vahid ekosistemdə birgə mövcud olduğu və mənşəyi ilə əlaqəsini qoruyaraq tədricən şəhər landşaftının bir hissəsinə çevrildiyi məkandır.
Tarix boyu bəşəriyyət daim hərəkətdə olub. Müharibələr, ticarət, sevgi, təhlükəsizlik arzusu və yeni imkanlar axtarışı insanları doğma yerlərini tərk etməyə, tanımadıqları mədəni mühitdə özlərinə yer tapmağa sövq edib. Yeni torpağa düşən bitkilər kimi, insan da uyğunlaşmaq, öz kimliyini yenidən dərk etmək və ətraf aləmlə münasibətlər qurmaq zərurəti ilə üzləşir.
Sərginin konsepsiyasında bitkilər miqrant insanın metaforasına çevrilir. Bəzi bitkilər yeni mühitdə tez kök salır, digərləri isə daimi qulluq və xüsusi yaradılmış şərait tələb edir. Bir qismi isə ətraf mühitin təsiri altında tədricən dəyişərək onun ayrılmaz hissəsinə çevrilir. Bu proseslər miqrasiya təcrübəsinin çoxşaxəliliyini üzə çıxarır və assimilyasiyaya yalnız sosial hadisə kimi deyil, insanla mühit arasında mürəkkəb qarşılıqlı təsir prosesi kimi baxmağa imkan yaradır.
Bədii araşdırmanı nəbatat bağının məkanı ilə birləşdirən sərgi torpaq haqqında yalnız fiziki ərazi kimi deyil, həm də yaddaşın, kimliyin və mənsubiyyət hissinin daşıyıcısı kimi düşünməyə dəvət edir. Məkanı vətənə çevirən nədir?
Yad torpaqda kök salmaq mümkündürmü? Yeni mühitə təbii uyğunlaşma ilə yaşamaq naminə dəyişmək zərurəti arasındakı sərhəd haradan keçir?
“Torpaq” tamaşaçıları ev hissinin necə formalaşdığı, doğma mühiti tərk edərkən özümüzlə nəyi qoruyub saxladığımız və yeni məkanın zamanla necə həyat hekayəmizin bir hissəsinə çevrildiyi barədə düşünməyə dəvət edir.
Sərginin rəsmi açılışı oktyabrın 24-də saat 16:00-da baş tutacaq. Növbəti həftələr ərzində ziyarətçiləri nəbatat bağının məkanını müxtəlif aspektlərdən araşdırmağa imkan verən tematik görüşlər silsiləsi gözləyir. Oktyabrın 31-də saat 14:00-da Nərgiz Ramizqızı nano-tur keçirəcək, noyabrın 7-də saat 14:00-da Emin Mathers qonaqları foto-tura dəvət edəcək, noyabrın 14-də saat 14:00-da isə Ramil Aliev botanika turu təşkil edəcək. Proqram noyabrın 21-də saat 14:00-da Cəbrayıl Quliyevlə görüş və sərginin finissajı ilə yekunlaşacaq.
Qeyd edək ki, sərgiyə giriş sərbəstdir. Bakı Mərkəzi Nəbatat Bağının ərazisinə giriş haqqı 2 manat təşkil edir.
