Bakının Həsən Əliyev küçəsində, Azərbaycan Dövlət İqtisad Universitetinin (UNEC) ikinci tədris korpusunun qarşısında həyata keçirilən təmir işləri tələbələrin ərazidən keçidini çətinləşdirib. Sosial şəbəkələrdə yayılan kadrlardan ərazidə piyadaların dar keçiddən istifadə etdiyi görünür. Alternativ və təhlükəsiz piyada yolunun kifayət qədər əlçatan olmaması isə ərazidə hərəkətin təhlükəsizliyi ilə bağlı suallar yaradıb.
Azərbaycan Avtomobil Yolları Dövlət Agentliyindən (AAYDA) Baki-baku.az-ın sorğusuna verilən cavabda bildirilib ki, ərazidə piyadaların rahat və təhlükəsiz hərəkətini təmin etmək üçün müvəqqəti piyada keçidi təşkil edilib. Bunun üçün xüsusi keçid sahəsi ayrılıb və həmin hissəyə çınqıl örtüyü salınıb.
Agentliyin məlumatına görə, ərazinin digər istiqamətində də piyadaların istifadə edə biləcəyi ayrıca keçid sahəsi yaradılıb.
Həmçinin qeyd edilib ki, təhlükəsizliyin təmin olunması məqsədilə hər iki istiqamətdə piyadalar üçün nəzərdə tutulan zonalar tikinti sahəsindən xüsusi çəpərlərlə ayrılıb. Bundan əlavə, ərazidə xəbərdaredici lentlərdən istifadə olunaraq piyada hərəkət sahələrinin tikinti zonasından fərqləndirilməsi təmin edilib.
