Bakı şəhəri və onun ətrafındakı qəsəbələrdə mövcud olan bir neçə yolötürücüsündə instrumental müayinə tədbirlərinin həyata keçirilməsinin davamı nəzərdə tutulub.
Baki-baku.az xəbər verir ki, bu barədə Azərbaycan Avtomobil Yolları Dövlət Agentliyi (AAYDA) məlumat yayıb.
Müayinə işlərinin aşağıdakı tarix və məkanlarda aparılması planlaşdırılır: 4 oktyabr – Ziya Bünyadov prospekti, “Çermet” yolötürücüsü, 10 oktyabr – M-1 Bakı-Quba-Rusiya Federasiyası dövlət sərhədi avtomobil yolunun 10-cu kilometri (Ekologiya postu), 11 oktyabr – M-1 Bakı-Quba-Rusiya Federasiyası dövlət sərhədi avtomobil yolu (Bakı Beynəlxalq Avtovağzal Kompleksinin qarşısı).
Verilən məlumata görə, müayinə tədbirləri qeyd olunan tarixlərdə gecə saat 1:00-dan 5:00-dək icra ediləcək.
“Bu müayinələr körpü və yolötürücülərinin etibarlı istismarının təmin olunmasına, ehtimal edilən risklərin vaxtında aşkar edilməsinə və yol hərəkəti təhlükəsizliyinin gücləndirilməsinə yönəlib”, – AAYDA bildirib.
