Bakı, 8 may. Bu gün bütün Azərbaycan Şuşanın müdafiəsi və Azərbaycan ordusunun formalaşması tarixində adını qızıl hərflərlə yazdırmış Milli Qəhrəman Albert Aqarunovun xatirəsi qarşısında baş əyir.
Suraxanıdan olan böyük və mehriban ailənin kiçik oğlu, mənşəcə dağ yəhudisi olan Albert minlərlə yaşıdı kimi sakit həyat yaşaya bilərdi. Lakin doğma torpağa təhlükə gələndə, 23 yaşlı gənc tərəddüd etmədən könüllü olaraq cəbhəyə yollandı. O, T-72 tankının (bort nömrəsi 533) sükanı arxasına keçərək düşmən üçün əsl kabusa, sarsılmaz iradə və yüksək peşəkarlıq rəmzinə çevrildi.
1992-ci ilin həmin taleyüklü may günlərində Şuşa uğrunda gedən döyüşlərdə Albert Aqarunov misilsiz qəhrəmanlıq və igidlik nümayiş etdirdi. Onun tankı döyüşün ən qaynar nöqtələrinə ilk daxil olanlardan idi, dəqiq atəşlə düşmənin atəş nöqtələrini, zirehli texnikasını və canlı qüvvəsini məhv edirdi. Məhz Albert Aqarunov şəhərə yaxın ərazilərdə baş vermiş məşhur tank duelində ermənilərə məxsus T-72 tankı (bort nömrəsi 442) ilə təxminən 350 metr məsafədə ustalıqla döyüşmüşdü. Onun tankının üçüncü atəşi həlledici oldu — düşmən tankı vurularaq alova büründü. Aqarunovun ekipajı ən azı iki düşmən tankını sıradan çıxarmış, düşmən sıralarında təşviş yaratmış, döyüş yoldaşlarını qorumuş və onların hücum planlarını pozmuşdu.
Düşmənlər bu qorxmaz tankçıdan o qədər çəkinirdilər ki, onun başına böyük məbləğdə pul mükafatı qoymuşdular — Albert onlar üçün əsas hədəflərdən birinə çevrilmişdi. Lakin bunu bildiyi halda belə, qəhrəman inanılmaz cəsarətlə döyüşməyə davam edirdi.
Döyüş ən kritik məqama çatanda və tank mövqeyini dəyişərkən Albert tankın qarşısında həlak olmuş azərbaycanlı döyüşçülərin cəsədlərini gördü. Tankın onların üzərindən keçməməsi üçün o, lyukdan çıxaraq döyüş yoldaşlarının nəşlərini kənara çəkməyə başladı. Həmin an düşmən snayperi atəş açdı və ölümcül güllə 23 yaşlı qəhrəmanın həyatına son qoydu.
1992-ci il mayın 8-də Albert Aqarunov Şuşa, Azərbaycan və Vətəninin gələcəyi uğrunda ən qiymətli neməti — gənc həyatını fəda etdi. Onun qəhrəmanlığı qan və cəsarətin millət tanımadığını göstərən əsl vətənpərvərlik nümunəsinə çevrildi.
Azərbaycanda bu əfsanəvi qəhrəmanın şərəfinə abidələr və xatirə kompleksləri ucaldılıb. Onun adı Bakıda və digər şəhərlərdə küçələrə verilib, bakılı tankçılar isə öz döyüş maşınlarını qürurla “Albert” adlandırırlar. Xalq sevgi və dərin ehtiramla belə deyir: “Azərbaycanın yəhudi oğlu”. Çünki o ağır illərdə cəbhədə heç kim milliyyət soruşmurdu — hamı bir torpağı qorumaq üçün çiyin-çiyinə dayanmışdı.
Albert Aqarunov daim birlik, misilsiz igidlik, peşəkarlıq və Vətənə sonsuz sevgi rəmzi kimi yaşayacaq. Onun adı Azərbaycanın yeni nəsil müdafiəçilərinə borca sədaqət və qəhrəmanlıq ruhu aşılayır.
Qəhrəmanın ruhu qarşısında baş əyirik!
Murad Muxtarov
