2024-cü ildə istifadəçilər “Google” axtarış sistemində ən çox ABŞ-nin seçilmiş Prezidenti Donald Tramp və Uels şahzadəsi Keyt Middlton haqqında məlumat axtarıblar.
Baki-Baku.az bu barədə şirkətin dərc etdiyi hesabata istinadən xəbər verir.
İstifadəçilər arasında ən çox maraq doğuran hadisə ABŞ-də noyabr ayında keçirilən prezident seçkisi olub. Onlar eyni zamanda təbii fəlakətlər, xüsusilə ABŞ-də baş verən “Milton” qasırğası, Yaponiyada tayfun haqqında məlumatları tez-tez axtarışa veriblər. Üçüncü pillədə isə Parisdə keçirilən Yay Olimpiya Oyunları ilə bağlı axtarışlar yer alıb. Bununla yanaşı, Ukrayna münaqişəsi ilin ən populyar 10 axtarış mövzusuna daxil olmayıb.
“Google”un məlumatına əsasən, filmlər arasında ən çox maraq “Disney” və “Pixar” studiyalarının “Inside Out-2” (“Duyğular Tapmacası 2”) cizgi filminə yönəlib. İlk beşliyə, həmçinin “Deadpool and Wolverine” (“Dedpul və Rosomaxa”), “Saltburn” (“Soltbern”), “Beetlejuice Beetlejuice” (“Bitlcus Bitlcus”) və “Dune: Part Two” (“Dyuna: İkinci hissə”) filmləri daxil olub.
