Bu gün – oktyabrın 9-da Xocavənd rayonunun Hadrut qəsəbəsinin və bir sıra ətraf kəndlərin işğaldan azad edilməsindən altı il ötür.
Baki-baku.az xatırladır ki, 2020-ci il oktyabrın 9-da, Vətən müharibəsinin gedişində Azərbaycan Ordusu bir sıra strateji əraziləri işğaldan azad edərək tariximizin şanlı səhifələrindən birini yazıb.
Prezident, Silahlı Qüvvələrin Ali Baş Komandanı İlham Əliyev həmin gün rəsmi “X” sosial şəbəkə hesabında xalqımıza qələbə müjdəsini çatdırıb. Dövlət başçısı Xocavənd rayonunun Hadrut qəsəbəsi və Sor kəndinin, Tərtər rayonunun Çaylı kəndinin, Cəbrayıl rayonunun Qışlaq, Qaracallı, Əfəndilər və Süleymanlı kəndlərinin, eləcə də Füzuli rayonunun Yuxarı Güzlək və Gorazıllı kəndlərinin Azərbaycan Ordusu tərəfindən işğaldan tam azad edildiyini elan edib.
Hadrutun azad olunması Vətən müharibəsinin gedişində mühüm hərbi-strateji əhəmiyyət daşıyan hadisələrdən biri olub. Bu qələbə Azərbaycan xalqının illərlə davam edən torpaq həsrətinin sona çatacağına inamını gücləndirib, ölkəmizdə böyük sevinc və qürur hissi yaradıb.
Oktyabrın 9-da elan edilən azadlıq xəbərləri Azərbaycanın ərazi bütövlüyünün bərpası uğrunda mübarizəsində mühüm mərhələ kimi tarixə düşüb. Bu gün həmin hadisələr xalqımızın qəhrəmanlıq salnaməsinin ayrılmaz hissəsi kimi ehtiramla xatırlanır.
