Şəxsiyyət haqqında düşüncələr – Leyla Əliyeva

Hər bir insan böyüyüb formalaşdıqca həyatının müxtəlif dövrlərindən keçir. Şübhəsiz ki, insan nə qədər mürəkkəb və çoxşaxəli olarsa, həyatın mənası və bu mürəkkəb dünyadakı missiyası barədə də bir o qədər çox düşünür. Etiraf edim ki, mənim də özümü və yaşadığım cəmiyyətdə yerimi axtardığım anlar olur. Hər zaman irəliləmək və inkişaf etmək üçün motivasiya tapmaq asan olmur. Amma həqiqətdir ki, həyat ziddiyyətlərdən ibarətdir: əgər bu gün onun qaranlıq tərəfindəsənsə, əmin ol ki, sabah mütləq işıqlı tərəfinə keçəcəksən. Həyat yolu boyunca bu belə davam edir.

Belə günlərin birində, həyatın qaranlıq zolağında olduğumu hiss edərkən öz-özümə düşündüm: bəlkə dünyaya baxış bucağımı dəyişsəm, dünya mənim üçün bir az da gözəlləşər? Bəlkə məni sıxan, narahat edən düşüncələrə deyil, mənə güc və ilham verən məqamlara diqqət yetirməliyəm?

Məhz belə bir ovqatla “Instagram” lentini vərəqləyərkən Leyla Əliyevanın səhifəsinə rast gəldim və onun həyatını araşdırmağa başladım. Açığını deyim ki, onun malik olduğu imkanların fərqindəyəm.

Azərbaycan Respublikasının Prezidenti İlham Əliyevin və Birinci vitse-prezident Mehriban Əliyevanın qızı Leyla Əliyeva 3 iyul 1985-ci ildə Bakıda anadan olub. İlk baxışdan elə görünə bilər ki, belə nüfuzlu bir ailədə doğulmaq insanın qarşısında bütün qapıları açır. Lakin paradoks da məhz bundadır. Yüksək gözləntilər, daim diqqət mərkəzində olmaq, heç vaxt “sadəcə özün” ola bilməmək – bütün bunlar belə insanların üzərinə düşən ciddi sınaqlardır. Leyla Əliyeva isə öz yolunu şəraitə rəğmən məhz xarakterinin gücü sayəsində tapmağı bacarıb.

Rəssam: qara, ağ və rəngin mənası

Leyla Əliyevanın rəngkarlığı dekorativ mənzərələrdən və ya məişət səhnələrindən ibarət deyil. Bu, hər xəttin öz mənasını daşıdığı xüsusi vizual dildir.

Onun əsərlərinin əksəriyyəti qara-ağ rəng çalarında işlənib. Saysız-hesabsız xırda detallar incə naxışlara çevrilərək bütöv bir obraz yaradır. Rəssam zərgər dəqiqliyi ilə çalışır: xətt-xətt – qalın və nazik, düz və dalğavari, aydın və çətin seçilən cizgilər bir-birini tamamlayır. Onların heç biri təsadüfi deyil. Nəticədə hissələrin sadə cəmindən daha böyük bir bütövlük – hər detalın öz yerini və mənasını tapdığı canlı bir sənət əsəri meydana gəlir.

Lakin rəssam bu ciddi monoxrom aləmə mütləq rəng çaları da əlavə edir. Buludların arasından süzülən günəş şüası kimi parlaq rənglər xatırladır ki, ən qaranlıq və sirli məkanda belə işığa həmişə yer var. Fırça ilə ifadə olunan bu fəlsəfə onun poeziyası ilə də səsləşir.

Leyla Əliyevanın rəsm əsərləri Bakı, Moskva, London və Parisdə nümayiş etdirilərək müasir incəsənət sevərlərinin böyük marağına səbəb olub. Sənətşünaslar onun bədii təfəkkürünün yetkinliyini və kompozisiya duyumunun dəqiqliyini xüsusi qeyd edirlər. Bu əsərlərdə yaradıcı insanın mürəkkəb və dərin daxili aləmi, gənc qəlbin sadəliyi və xeyirxahlığı, işıqla qaranlığın əbədi mübarizəsi təbii ahəng içində birləşir. Və bu mübarizədə, əlbəttə ki, həmişə xeyir qalib gəlir.

Şair: zülmətin sonundakı işıq

Leyla Əliyeva Azərbaycan, rus və ingilis dillərində nəşr olunmuş bir neçə şeir kitabının müəllifidir. Onun şeirləri bəzən mənəviyyatdan bəhs etsə də, oxucunu heç vaxt ümidsizliyə sürükləmir.

Bunun sirri ondadır ki, o, tənhalıq haqqında belə sarsılmaz ümid hissi ilə yazır. Şair ağrını olduğu kimi adlandırmaqdan çəkinmir. Üstəlik, bunu elə ifadə edir ki, ağrı artıq qorxulu və qaçılmaz görünmür. Bu, nadir bir istedaddır – mürəkkəb hisslərdən elə danışmaq ki, oxucu kitabı bağlayarkən özünü tükənmiş deyil, əksinə, ruhlanmış və ümidlə dolu hiss etsin.

Müəllif özü də etiraf edir ki, poeziya onun üçün öz hisslərini anlamağın və bu hissləri misralarında özünü tapan insanlarla bölüşməyin yoludur. Düşünməyə dəyər: əsl yaradıcılığın əsas missiyası məhz insanlara ümid və həyata inam aşılamaq deyilmi?

Redaktor və media lideri

Təsviri incəsənət və ədəbiyyatla yanaşı, Leyla Əliyeva nəşriyyat sahəsində də uğur qazanıb. O, Azərbaycan mədəniyyətini, dəbini və həyat tərzini beynəlxalq media məkanının ayrılmaz hissəsinə çevirən “Baku” jurnalının təsisçisi və baş redaktorudur.

Jurnal bir neçə dildə nəşr olunur və ölkə hüdudlarından kənarda geniş yayılaraq Azərbaycanı müasir, çoxşaxəli və dünyaya açıq bir dövlət kimi təqdim edir.

Təbiətə qayğı: ekologiya sahəsində beynəlxalq fəaliyyət

2011-ci ildə Leyla Əliyeva IDEA – Ətraf Mühitin Mühafizəsi naminə Beynəlxalq Dialoq İctimai Birliyini təsis edib. Təşkilat ekoloji maarifləndirmə, dayanıqlı turizmin inkişafı və təbiətin qorunması istiqamətində genişmiqyaslı fəaliyyət göstərir.

Sosial şəbəkələrdə Leyla xanımın fəaliyyətini izləyən hər kəs əmin ola bilər ki, flora və faunaya olan sevgisi sadəcə gözəl sözlərdən ibarət deyil, Yer üzündəki bütün canlılara göstərilən səmimi və həqiqi qayğının ifadəsidir.

Çünki kiçik qardaşlarımız adlandırdığımız canlılara bu qədər həssas münasibət göstərmək onların ruhunu duymadan, belə mərhəmətli, şəfqətli və həssas qəlbə sahib olmadan mümkün deyil. Leyla Əliyevanın ən diqqətçəkən xüsusiyyətlərindən biri də məhz budur.

İctimai xadim: insanlara daha yaxın

Leyla Əliyeva Heydər Əliyev Fondunun vitse-prezidentidir. Onun kuratorluğu ilə Azərbaycanın müxtəlif bölgələrində onlarla sosial layihə həyata keçirilir.

O, mütəmadi olaraq ahıllar evlərinə və əlilliyi olan şəxslər üçün nəzərdə tutulmuş müəssisələrə baş çəkir. Anadangəlmə və ya sonradan yaranmış ağır xəstəliklərdən, o cümlədən qan və onkoloji xəstəliklərdən əziyyət çəkən uşaqlara xüsusi diqqət və qayğı göstərilir. Xəstə uşaqlarla görüşlər rəsmi protokolun bir hissəsi deyil, onların qayğı və ehtiyaclarına göstərilən səmimi insan münasibətinin təzahürüdür.

Leyla Əliyeva kiçik sahibkarların və xalq sənətkarlarının dəstəklənməsi istiqamətində fəaliyyəti ilə də geniş tanınır. Onun rəhbərliyi ilə milli sənətkarlıq ənənələrinin yaşadılması və gələcək nəsillərə ötürülməsi üçün müxtəlif təşəbbüslər həyata keçirilir.

Onun iştirakı ilə Bakı, Qəbələ və ölkənin digər bölgələrində yaşıllaşdırma aksiyaları təşkil olunur. Yevlax da daxil olmaqla bir sıra rayonları əhatə edən “Gənc arıçı” layihəsi gəncləri ekoloji sahibkarlığa və biomüxtəlifliyin qorunmasına cəlb edir. Bunlar birdəfəlik aksiyalar deyil, yeni nəslin təbiətə məsuliyyətli münasibət ruhunda formalaşdırılmasına yönəlmiş sistemli fəaliyyətin tərkib hissəsidir.

“İstedadlı insan hər sahədə istedadlıdır”

Bəzən bu ifadə sadəcə klişe kimi səslənir. Amma onun canlı təcəssümünü görəndə anlayırsan ki, bu fikirdə böyük həqiqət var. Leyla Əliyeva eyni zamanda həm zərif, həm qətiyyətli, həm düşüncəli şair, həm fəal təşkilatçı, həm incə estetik duyuma malik rəssam, həm də qlobal baxışlı diplomat olmağı bacarır. Onun şəxsiyyətində qadın zərifliyi ilə sarsılmaz iradə heyrətamiz ahəng təşkil edir.

Həqiqətən də, Yer üzündə hər insana Leyla Əliyevanın sahib olduğu imkanlar nəsib olmur. Belə nüfuzlu və böyük şəxsiyyətlərin ailəsində dünyaya gəlmək həm böyük şərəf, həm də böyük məsuliyyətdir. Lakin uşaqlıqdan daim diqqət mərkəzində olarkən daxili işığını, mənəvi harmoniyasını, sonsuz xeyirxahlığını, mərhəmətini, başqalarının ağrısına və ehtiyaclarına həssas münasibətini, insanları anlamaq, onlara kömək etmək və qorumaq istəyini qoruyub saxlamaq qat-qat çətindir.

Leyla Əliyevanın timsalında bir daha anlayırıq ki, istedadlı insan təkcə yaradıcılıqda deyil, həm də qəlbinin xeyirxahlığında, humanizmində və yaşadığı dünyaya maksimum fayda vermək istəyində istedadlı olur. Məgər əsl İnsan olmağın əsas missiyası da elə bu deyilmi?

İnanın, insanın doğulduğu gündən hansı imtiyazlara malik olması ən vacib məsələ deyil. Əsas olan onun nə hiss etməsi, nəyi dərk etməsi, həyatda nəyə dəyər verməsi, həyatının mənasını və missiyasını nədə görməsidir.

Leyla Əliyeva ona təbiətin, Uca Yaradanın və ailəsinin bəxş etdiyi nemətlərin dəyərini çox yaxşı anlayır. Heç bir şübhə yoxdur ki, o, ətrafındakı insanların həyatını daha xoşbəxt və daha gözəl etmək üçün əlindən gələni edir. Bu isə artıq yalnız onun öz xidmətidir. Sadə insanların, edilən yaxşılıqların şöhrət naminə deyil, ürəyin səsi ilə həyata keçirildiyini anlayan insanların qarşısındakı xidmətidir. Elə bir missiya naminə ki, Leyla Əliyevanın timsalında onun tam mənası ilə həyata keçirilə bildiyini görürük.

Deniz Məmmədli