Dünyanın bir çox ölkəsində sevgi günü 14 fevralda qeyd olunsa da, Azərbaycanda sevginin daha fərqli, daha mənalı bir ünvanı var. Bu, təkcə iki insanın bir-birinə olan məhəbbətinin deyil, həm də Vətən sevgisinin, sədaqətin və fədakarlığın simvoluna çevrilmiş 30 iyun tarixidir.
Bu gün Azərbaycanda qeyri-rəsmi olaraq Milli Sevgililər Günü kimi qeyd olunur. Tarixin seçilməsi isə təsadüfi deyil. Çünki 1989-cu il iyunun 30-da İlham və Fərizə Allahverdiyevlər ailə quraraq həyatlarını birləşdirmişdilər. Onların sevgisi qısa sürsə də, əbədiyyət qazandı və illər keçdikcə Azərbaycan xalqının yaddaşında saf məhəbbətin rəmzinə çevrildi.
İlham və Fərizənin ailə həyatı cəmi bir neçə ay davam etdi. Onlar gələcək üçün böyük arzular qurmuş, yeni evlərini sevgi ilə bəzəmiş, xoşbəxt günlər yaşayacaqlarına inanmışdılar. Hələ cehizlərinin bir çoxu istifadə olunmamış, evlərində hər şey yeniliyin və ümidin nəfəsini qoruyurdu. Lakin tarix onların taleyinə başqa bir yol yazmışdı.
1990-cı ilin 20 Yanvar gecəsində sovet ordusunun Bakıya qanlı müdaxiləsi minlərlə ailənin taleyini dəyişdi. İlham da həmin gecə Vətəni müdafiə etmək üçün küçələrə çıxanlardan biri oldu. O, artıq təkcə həyat yoldaşının deyil, bütöv Azərbaycanın gələcəyi naminə mübarizə aparırdı. Ağır yaralanan İlham xəstəxanaya çatdırılsa da, həkimlərin bütün səylərinə baxmayaraq şəhid oldu.
Deyirlər ki, həqiqi sevgi sözlə yox, hisslə yaşayır. Fərizə hələ rəsmi xəbər gəlməmiş həyat yoldaşının başına gələn faciəni ürəyində hiss etmişdi. Bir müddət sonra acı həqiqəti öyrənəndə isə bu ayrılığa dözə bilmədi. Yazdığı vida məktubunda yaxınlarından onun üçün ağlamamalarını istədi və İlhamsız yaşaya bilməyəcəyini bildirdi. O, həyat yoldaşının yoxluğunu qəbul etmədi və onun ardınca əbədiyyətə qovuşdu. Beləliklə, iki gəncin sevgisi faciə ilə başa çatsa da, xalqın yaddaşında ölməz bir dastana çevrildi.
Bu gün Şəhidlər xiyabanında yanaşı uyuyan İlham və Fərizə 20 Yanvar şəhidləri olmaqla yanaşı, Azərbaycan sevgisinin, sədaqətinin və vəfasının ən təsirli simvollarından sayılırlar. Onların həyat hekayəsi göstərdi ki, sevgi yalnız xoş günlərdə deyil, ən ağır sınaqlarda da öz böyüklüyünü qoruyur.
Məhz buna görə də 2003-cü ildən etibarən 30 iyun Azərbaycanda qeyri-rəsmi Milli Sevgililər Günü kimi qeyd olunur. Bu gün gənclər bir-birinə hədiyyələr təqdim edir, sevgi etirafları səsləndirirlər. Amma bu tarix yalnız romantik hissləri ifadə etmək üçün deyil, həm də Fərizə və İlhamın ömürlük sədaqətini xatırlamaq, onların əziz xatirəsini ehtiramla yad etmək üçün əlamətdardır.
Azərbaycanın Milli Sevgililər Günü başqa ölkələrdəki analoji günlərdən fərqli olaraq kommersiya deyil, mənəvi dəyərlər üzərində formalaşıb. Bu tarix sevginin ən ali forması sədaqət, fədakarlıq və birlik olduğunu göstərir. İlham və Fərizənin sevgisi illər ötsə də köhnəlmir, əksinə, hər yeni nəsil üçün sevginin nə qədər müqəddəs və uca hiss olduğunu nümayiş etdirir.
Xanım Aydın
