Nərimanov rayonunda qurumuş ağacların yerinə yeniləri əkilib.

Baki-baku.az xəbər verir ki, Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidmətinin rəisi Hikmət Əlizadə bununla bağlı jurnalistlərə məlumat verib.

Bildirib ki, bu, istənilən ölkədə, istənilən şəhərdə baş verən normal prosesdir: “Məlumdur ki, ağaclar canlı aləmə məxsusdur, onların da bioloji ömrü var. Biz periodik olaraq ağacların quruması halını müşahidə edirik. Bu hal Nərimanov rayonunda da baş verib. Belə ki, Faiq Yusifov 40 küçəsində, Nərimanov Bələdiyyəsinin müraciəti əsasında, vətəndaşlara təhlükə yaradan quru ağacların götürülməsi ilə bağlı müraciət olunub və Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinin rəyi əsasında müvafiq şərtlər daxilində ağacların götürülməsinə və əvəzinə yeni ağacların əkilməsinə icazə verilib”.

Xidmət rəisi qeyd edib ki, artıq quru ağaclar götürülüb. Bu səhər Bakı Şəhər Yaşıllaşdırma Təsərrüfatı Birliyi tərəfindən həmin ağacların kötükləri çıxarılıb və hazırda yeni ağaclar əkilir. Bir daha qeyd edirəm ki, bu, normal prosesdir və şəhərin yaşıllıq faizinin azalmasından söhbət gedə bilməz”.