Bu gün, oktyabrın 18-də Azərbaycanın tarixinə qürur və zəfər günü kimi yazılan Xudafərin körpüsünün işğaldan azad edilməsindən altı il ötür.
Baki-baku.az xatırladır ki, 2020-ci il oktyabrın 18-də Vətən müharibəsi zamanı Azərbaycan Ordusunun Cəbrayıl rayonu istiqamətində həyata keçirdiyi uğurlu əməliyyatlar nəticəsində qədim Xudafərin körpüsü və ətraf ərazilər işğaldan azad edildi.
Həmin gün Prezident İlham Əliyev xalqımıza növbəti qələbə müjdəsini çatdıraraq, Azərbaycan əsgərlərinin Xudafərin körpüsünün üzərində üçrəngli bayrağımızı ucaltdığını bəyan etdi:
“Azərbaycan Silahlı Qüvvələri qədim Xudafərin körpüsünün üzərində Azərbaycan bayrağını qaldırdılar. Eşq olsun Azərbaycan xalqına! Qarabağ Azərbaycandır!”
Bu xəbər yalnız hərbi uğurun deyil, həm də xalqımızın tarixi yaddaşının, milli qürurunun və torpaqlarımıza bağlılığının təntənəsi idi. Əsrlərin şahidi olan Xudafərin körpüsü üzərində Azərbaycan bayrağının dalğalanması ölkəmizin ərazi bütövlüyünün bərpası uğrunda mübarizədə rəmzi əhəmiyyət daşıyan hadisələrdən birinə çevrildi.
Araz çayı üzərində yerləşən Xudafərin körpüləri Azərbaycanın qədim memarlıq irsinin qiymətli nümunələrindəndir. Tarix boyu mühüm keçid məntəqəsi olmuş bu körpülər xalqımızın mədəni irsini, keçmişini və tarixi coğrafiyasını özündə yaşadır.
2020-ci il oktyabrın 18-də Xudafərin üzərində Azərbaycan bayrağının ucaldılması Vətən müharibəsinin yaddaşlara həkk olunan anlarından biri kimi tarixə düşdü. Bu gün həmin hadisədən altı il ötür. Xudafərin körpüsü isə öz qədim daşlarında xalqımızın tarixini, azadlıq iradəsini və Zəfər yaddaşını yaşatmaqda davam edir.
