Müntəzəm olaraq kifayət qədər maye qəbul etməmək bədənin stresə reaksiyasını gücləndirə bilər.

Baki-baku.az xəbər verir ki, American Journal of Physiology-Endocrinology and Metabolism jurnalında dərc olunmuş yeni araşdırmada bu qənaətə gəlinib.

Təcrübədə 32 nəfər könüllü iştirak edib. Onların bir qismi gündə orta hesabla 1,3 litr, digər qismi isə 4 litrdən çox su içib. Standart stress testi zamanı az su qəbul edən iştirakçılarda stress hormonu – kortizolun səviyyəsi daha kəskin artıb. Daha çox su içənlərdə isə bu artım nisbətən zəif müşahidə olunub.

Alimlərin fikrincə, orqanizmin kifayət qədər nəmlənməməsi (məsələn, sidiyin tünd rəngdə olması) birbaşa endokrin sistemin fəaliyyətinə təsir göstərir. Bu isə uzunmüddətli perspektivdə sağlamlıq üçün əlavə risklər yarada bilər.

Mütəxəssislər bildirirlər ki, düzgün maye qəbulu rejimi stressin təsirini azalda bilər və psixofizioloji tədqiqatlarda nəzərə alınmalıdır.