Mədəniyyət xalqları bir-birinə bağlayan ən böyük qüvvə, ədəbiyyat isə Türk dünyasını birləşdirən ən güclü körpülərdən biridir. Məhz bu ortaqlıq türk xalqlarını eyni dəyərlər ətrafında sıx şəkildə birləşdirir.

Baki-baku.az xəbər verir ki, bu fikirləri Beynəlxalq Türk Mədəniyyəti Təşkilatının (TÜRKSOY) Baş katibi Sultan Raev Ağdam Muğam Mərkəzində TÜRKSOY-un tərəfdaşlığı ilə keçirilən “Sözün sabahı – Türk dünyasının gənc şairlər festivalı”nda çıxışı zamanı bildirib.

Sultan Raev gənc şairlərə və sənət adamlarına xüsusi önəm verdiklərini vurğulayıb. Baş katib qeyd edib ki, sabahın Türk dünyası məhz bu gün formalaşan zəngin mədəniyyət üzərində qurulur. Bu cür tədbirlərin Türk dünyasının ortaq tarixinə, mədəniyyətinə və gələcəyinə olan inamı daha da gücləndirdiyini deyən S.Raev, festivalın hər il Türk dünyasının fərqli şəhərlərində təşkil olunaraq gözəl bir ənənəyə çevrilməsini arzulayıb.