Paytaxtda tibb və sosial xidmət müəssisələrinə gələnlər üçün rahat şəraitin yaradılması istiqamətində işlər davam etdirilir.
Baki-baku.az Azərbaycan Yerüstü Nəqliyyat Agentliyinə istinadla xəbər verir ki, 3, 5, 33 nömrəli şəhər poliklinikalarının, 3 nömrəli Vərəm Əleyhinə Dispanserin və “Diamed Hospitalın” yanında minib-düşməni həyata keçirmək üçün yer və taksilər üçün duracaq təşkil olunub. Bu məqsədlə bəzi parklanma yerləri ləğv olunaraq 3.28 – “durmaq qadağandır”, “5.14” – “minik taksilərinin duracaq yeri” nişanları və xüsusi hərəkət zolağında məlumat lövhəsi quraşdırılıb.
Beləliklə, Fuad İbrahimbəyov və Cəfər Cabbarlı küçələri, 3 nömrəli şəhər poliklinikasının yanında taksi duracağı və avtobus zolağında minib-düşmə yeri; Nəcəf bəy Vəzirov küçəsi, 5 nömrəli şəhər poliklinikasının yanında minib-düşmə yeri və taksi duracağı; Neftçi Qurban Abbasov küçəsi, 33 nömrəli şəhər poliklinikası və 3 nömrəli Vərəm Əleyhinə Dispanserin yanında minib-düşmə yeri və taksi duracağı; Həsən Əliyev küçəsinin Atatürk prospekti ilə kəsişməsi, “Diamed Hospital”ın yanında minib-düşmə yeri təşkil olunub.
