Bakı metrosunun ən simvolik və tarixi stansiyalarından biri olan “İçərişəhər” stansiyası həm memarlığı, həm də yerləşməsi baxımından şəhərin mərkəzində yerləşən unikal nəqliyyat nöqtəsidir. Qırmızı xəttin sonuncu stansiyası olan “İçərişəhər”, qədim Bakının qalaları ilə müasir şəhər həyatının qovuşduğu yerdə yerləşir.
Tarixi keçmişi
“İçərişəhər” stansiyası 1967-ci il noyabrın 25-də açılıb. Uzun müddət “Bakı Soveti” adı ilə tanınan stansiyanın əvvəlki adı, yaxınlığında yerləşən Bakı Soveti binasından götürülmüşdü. Stansiya, Bakı metrosunun ilk istismara verilən xəttinin – “Bakı Soveti – Nərimanov” marşrutunun bir hissəsi idi.
Dizayn və ideya baxımından stansiya Sovet dövrünün ruhunu əks etdirirdi. Zalda yerləşən mərmər plitələrdə o dövrün ideoloji xəttinə uyğun olaraq Azərbaycanın SSR dövründəki nailiyyətlərini əks etdirən oyma təsvirlərə yer verilmişdi.
2008-ci ildə baş vermiş genişmiqyaslı təmirdən sonra stansiya həm xarici, həm də daxili baxımdan tam yenilənib. Giriş hissəsi şəffaf şüşədən və metaldan hazırlanan piramida formasında inşa olunub. Vestibülün hündürlüyü İçərişəhər qala divarları ilə eyni – 14 metrdir.
Aşağı vestibülün sahəsi 1200 kvadratmetrdir və buranın divarlarında Fransada hazırlanmış qədim Bakının 16 mənzərəsi əks olunub. Eləcə də İçərişəhərin qala divarlarının fraqmenti bu hissəyə əlavə edilib ki, bu da stansiyaya tarixi ab-hava bəxş edir.
Stansiyanın xüsusiyyətləri və simvolik mənası
“İçərişəhər” stansiyası Qırmızı xəttin sonuncu stansiyasıdır, yəni terminal stansiyadır – qatarlara yalnız bir platformadan minik və eniş həyata keçirilir. Yeganə çıxışı İstiqlaliyyət küçəsinə açılır.
Stansiyaya daxil olan qatarlarda Vaqif Mustafazadənin improvizə etdiyi məşhur “Bakı Gecələri” musiqisinin fraqmenti səslənir. Bu da stansiyaya unikal emosional toxunuş verir.
2007-ci ildə Azərbaycan Respublikasının Nazirlər Kabinetinin qərarı ilə stansiyanın adı “Bakı Soveti”ndən “İçərişəhər”ə dəyişdirildi. Bu ad dəyişikliyi stansiyanın coğrafi yerləşməsi və Bakı qalasının qədim divarlarına olan yaxınlığı ilə əlaqələndirilir. “İçərişəhər” – yəni “Qədim şəhər” – Bakının mədəni və tarixi mərkəzinin rəmzidir.
Tarixin bir parçası
“İçərişəhər” metrostansiyası nəqliyyat vasitəsi olmaqla yanaşı, Bakı şəhərinin tarixi yaddaşının bir parçasıdır. Memarlıq gözəlliyi, tarixi əhəmiyyəti və müasir dizaynı ilə bu stansiya hər gün minlərlə sərnişinə keçmişlə gələcək arasında bir körpü təşkil edir. Bakıya gələn turistlər də metromuza maraq göstərir. Bu stansiyanın qapılarından keçib ekskalatorda ən gözəl Azərbaycan musiqilərini dinləyərək platformaya enirlər. Bayram günlərində keçmiş qatarlar da şəhər sakinlərinə və qonaqlara təqdim olunur. Orada şəkil çəkdirmək, nostalji hisslər yaşamaq və sadəcə keçmişimizlə yaxından tanış olmaq olar.
Xanım Aydın
