Bakı Ağır Cinayətlər Məhkəməsi Ağcabədi şəhərində yaşayan 1980-ci il təvəllüdlü Elnur Vəliyevə (ad və soyad şərtidir) qarşı hökm çıxarıb.
Baki-baku.az-in məlumatına görə, təqsirləndirilən şəxs Azərbaycan Respublikasının Cinayət Məcəlləsinin 206.3.2-ci maddəsi (xeyli miqdarda qaçaqçılıq) ilə təqsirli bilinib.
Hadisə 2022-ci il oktyabrın 20-dən 22-dək olan dövrdə Birləşmiş Ərəb Əmirliklərinin Dubay şəhərində baş verib. Təqsirləndirilən şəxs bacısı oğlu, tanışları və digər şəxslərlə qrup halında cinayət əlaqəsinə girib, ümumi dəyəri 100 min manat olan 40 ədəd iPhone telefonunu (17 ədəd iPhone 14 Pro 128GB, 13 ədəd iPhone 14 Pro 256GB, 3 ədəd iPhone 14 Pro Max 128GB və 7 ədəd iPhone 14 Pro Max 256GB) qaçaqçılıq yolu ilə Azərbaycana gətirməyi təşkil edib.
Telefonlar Türkiyədən tranzit keçməklə Azərbaycana daxil edilib və cinayətkar qrupun üzvlərinə təhvil verilib.
Məhkəmə istintaqı zamanı təqsirləndirilən şəxs günahını etiraf edib, lakin iştirakçıların istintaqla tam müəyyən edilmədiyini qeyd edib. Şahidlərin və zərərçəkmişlərin ifadələri hadisəni təsdiqləyib. Məhkəmə təqsirləndirilən şəxsi 5 il azadlıqdan məhrum etmə cəzasına məhkum edib.
