Cənubi Koreyanın Busan şəhərində keçirilən Asiya Məzmun və Film Bazarı (ACFM) başa çatıb. Azərbaycanın nümayəndə heyəti beynəlxalq kino sənayesinin mühüm platformalarından olan tədbirdə ölkəmizi uğurla təmsil edib.
Baki-baku.az xəbər verir ki, nümayəndələrimiz ACFM çərçivəsində Koreya, Çin, Yaponiya, Kanada, Fransa və başqa ölkələrdən olan prodüserlər, distribütorlar və kino sənayesinin digər təmsilçiləri ilə görüşlər keçiriblər. Görüşlər zamanı ortaq layihələrin həyata keçirilməsi, əməkdaşlığın inkişafı, birgə audiovizual məzmun istehsalı və Azərbaycanın kino sənayesinin beynəlxalq bazarlarda təmsil olunması ilə bağlı fikir mübadiləsi aparılıb.
Tədbir yeni əməkdaşlıq münasibətlərinin qurulması, peşəkar əlaqələrin möhkəmləndirilməsi, müxtəlif ölkələrdən olan sənaye nümayəndələri ilə təcrübə mübadiləsinin aparılması, yeni ideyaların müzakirəsi və gələcək tərəfdaşlıq üçün zəmin yaradılması baxımından əhəmiyyətli olub.
Azərbaycan nümayəndə heyətinin tərkibində Yaponiya istehsalı olan “Vivant” (2025) çoxseriyalı bədii filminin ölkəmizdə çəkilişlərini həyata keçirmiş “Bakı Media Mərkəzi”nin nümayəndəsi, prodüser Fuad Məmmədzadə və və 2026-cı ildə “Tanrının Zirehi 4: Ultimatum” filminin çəkilişlərini həyata keçirmiş “Filmlab” şirkətinin direktoru İsa Məlikov da təmsil olunublar. Səfərin rəsmi media tərəfdaşı isə “NARGIS” jurnalı olub.