Azərbaycan xalqının qəlbində Böyük Vətən müharibəsinin ən ağır illərində dünyaya əsl cəsarətin, qeyrətin və Vətən sevgisinin nə olduğunu göstərən qəhrəmanların xatirəsi heç vaxt silinməyəcək. Bu igidlərin ən parlaq nümunələrindən biri də Sovet İttifaqı Qəhrəmanı, qvardiya mayoru Müseyib Allahverdiyevdir. Onun qəhrəmanlığı bu gün də xalqının tarixini yaşadan hər kəsdə qürur və ehtiram hissi oyadır.
1909-cu il mayın 5-də Qazax rayonunun (indiki Ağstafa rayonu) Dağ Kəsəmən kəndində dünyaya gələn Müseyib Allahverdiyev uşaqlıqdan Azərbaycan döyüşçüsünə xas mərdlik ruhunda böyüyüb. Sadə kəndli ailəsindən çıxan Müseyib Allahverdiyev sıravi əsgərdən qvardiya zabitinə qədər yüksələrək sarsılmaz iradənin simvoluna çevrilib.
O, 1941-ci ilin iyul ayından Böyük Vətən müharibəsi cəbhələrində döyüşüb. Moskva uğrunda gedən döyüşlərdə göstərdiyi igidliyə görə “Qırmızı Ulduz” ordeni ilə təltif olunub. Daha sonra Xarkov yaxınlığındakı ağır döyüşlərdə iştirak edib, Ukraynanın Dnepropetrovsk, Zaporojye, Nikolayev, Krivoy Roq, Kirovoqrad şəhərlərinin azad olunmasında, həmçinin Kişinyovun alınmasında qəhrəmanlıq göstərib.
Onun hərbi istedadı xüsusilə Macarıstanda aparılan döyüşlərdə parlaq şəkildə üzə çıxıb. 1944-cü il dekabrın 1-nə keçən gecə qvardiya kapitanı Allahverdiyevin komandanlığı altında olan batalyon Dunay çayını uğurla keçərək mühüm plasdarm ələ keçirib. Şiddətli döyüş zamanı onun bölməsi düşmənin təxminən 500 əsgər və zabitini məhv edib, 2200-dən çox hitlerçini əsir götürüb, 24 top, 36 pulemyot, 8 minaatan, avtomobillər, arabalar, sursat və ərzaq anbarlarını qənimət kimi ələ keçirib.
Budapeşt uğrunda gedən döyüşlərdə isə Allahverdiyevin batalyonu mühasirədə olan alman qüvvələrinə köməyə gələn təxminən 120 tankdan ibarət böyük düşmən kolonunu dayandırıb. Komandanın düzgün taktikası və şəxsi şücaəti sayəsində döyüşçülər 25 tankı və düşmənin 700-dək əsgər və zabitini məhv edib, çoxlu sayda hərbi qənimət ələ keçiriblər.
1945-ci il martın 24-də SSRİ Ali Soveti Rəyasət Heyətinin fərmanı ilə Müseyib Allahverdiyevnə Lenin ordeni və “Qızıl Ulduz” medalı təqdim olunmaqla Sovet İttifaqı Qəhrəmanı adı verilib. Bu mükafat Azərbaycan zabiti və onun qvardiyaçılarının Avropanı faşizm bəlasından azad edərkən göstərdiyi misilsiz igidliyin layiqli qiyməti idi.
Bu gün Müseyib Allahverdiyevnin adı xalqın yaddaşında əbədiləşib. Onun doğulduğu Dağ Kəsəmən kəndində büstü ucaldılıb, Qazax şəhərində qəhrəmanın abidəsi qoyulub. Azərbaycanın müxtəlif bölgələrində küçələr və təhsil müəssisələri əfsanəvi kombatın adını daşıyır, onun qəhrəmanlığı məktəblərdə vətənpərvərlik və mərdlik nümunəsi kimi öyrənilir.
Müseyib Allahverdiyevnin adı sadəcə tarix kitablarında yazılmış bir səhifə deyil. O, nəsildən-nəslə ötürülən canlı əfsanədir. Onun oğlu Abdulla Allahverdiyev də müstəqil Azərbaycanın tarixində yüksək dövlət vəzifələrində çalışaraq öz izini qoyub. Qəhrəmanın qanı onun övladlarında yaşayır və bu, əsl qəhrəmanların heç vaxt unudulmadığının ən böyük sübutudur.
Azərbaycanda belə qəhrəmanlar hər zaman xüsusi ehtiramla xatırlanır — xüsusilə müqəddəs tarixlər ərəfəsində. Çünki qələbə ruhu bizim qanımızdadır.
