Bu gün Qubadlı şəhərinin işğaldan azad edilməsindən altı il ötür. 2020-ci il oktyabrın 25-i Azərbaycan tarixində torpaq həsrətinin sona çatdığı, illərlə yurd nisgili ilə yaşayan insanların qəlbində qayıdış ümidinin yenidən alovlandığı günlərdən biri kimi yadda qalıb.

İkinci Qarabağ müharibəsi zamanı Azərbaycan Ordusunun uğurlu hərbi əməliyyatları nəticəsində Qubadlı şəhəri işğaldan azad edildi. Həmin gün Prezident, Silahlı Qüvvələrin Ali Baş Komandanı İlham Əliyev xalqa müjdəli xəbəri çatdıraraq Zəngilanın dörd, Cəbrayılın beş, Qubadlının yeddi kəndinin və Qubadlı şəhərinin azad olunduğunu bildirdi.

Qubadlı təkcə xəritədə bir şəhər deyil. O, illərlə doğma yurdunun həsrəti ilə yaşayan insanların xatirələrində qoruduğu evlər, küçələr, uşaqlıq səsləri və geri dönmək arzusu deməkdir. İşğaldan azad edilməsi ilə şəhərin tarixində yeni mərhələnin əsası qoyuldu, doğma torpaqlarına qovuşmaq ümidi gerçəyə çevrilmək yoluna qədəm qoydu.

Prezident İlham Əliyevin 31 iyul 2023-cü il tarixli Sərəncamına əsasən, oktyabrın 25-i Qubadlı şəhəri günü kimi təsis edilib. Hər il qeyd olunan bu tarix şəhərin azadlığını, Azərbaycan Ordusunun qəhrəmanlığını və doğma yurda bağlılığın sarsılmazlığını xatırladır.

Bu gün Qubadlı adı çəkiləndə yaddaşlarda yalnız keçmişin ağrısı deyil, azadlığın gətirdiyi sevinc və gələcəyə inam da canlanır. Çünki yurdun əsl qayıdışı yalnız torpağın azadlığı ilə deyil, orada yenidən həyatın nəfəs alması, ocaqların isinməsi və insanların öz doğma şəhərlərinə qovuşması ilə tamamlanır.