Gentle Hands “Nəcib Əllər” Uşaqlara Dəstək İctimai Birliyinin təşkilatçılığı və QHT-lərə Dövlət Dəstəyi Agentliyinin maliyyə dəstəyi ilə onkoloji və hematoloji xəstəliklərdən müalicə olunan azyaşlıların valideynləri üçün “psixo-art master-klası” keçirilib.
Baki-baku.az xəbər verir ki, psixoloq və art-terapistin iştirakı ilə təşkil olunan master-klas zamanı valideynlər və xəstə yaxınları rənglər və təsvirlər vasitəsilə öz duyğularını ifadə edərək fərdi rəsm əsərləri ərsəyə gətiriblər.
Yaradıcılıq prosesi onlara daxili dünyalarına yönəlmək, hisslərini sənətin dili ilə ifadə etmək, gündəlik qayğıların yaratdığı emosional gərginlikdən uzaqlaşaraq mənəvi rahatlıq tapmaq imkanı verib. Görüş, həmçinin valideynlərin öz təcrübələrini bölüşməsinə, bir-birini daha yaxından anlamasına və səmimi ünsiyyət şəraitində qarşılıqlı dəstək hissini gücləndirməsinə şərait yaradıb.
Bu cür təşəbbüslər övladlarının müalicə prosesi ilə bağlı çətinliklər yaşayan valideynlərin emosional vəziyyətinə müsbət töhfə vermək, onların mənəvi baxımdan dəstəkləndiklərini hiss etmələrinə şərait yaratmaq, eləcə də birlik, həmrəylik və qarşılıqlı anlayış mühitini möhkəmləndirmək baxımından mühüm əhəmiyyət kəsb edir.
