Azərbaycan Dövlət Mədəniyyət və İncəsənət Universiteti (ADMİU) süni intellekt texnologiyalarından istifadə etməklə universitetin kommunikasiya fəaliyyətində yeni mərhələyə qədəm qoyur. Universitetin rəqəmsal mühitdə fəaliyyət göstərəcək yeni virtual simaları — İncə və Sənət təqdim olunub.

Baki-baku.az xəbər verir ki, süni intellekt texnologiyaları əsasında yaradılan İncə və Sənət ADMİU-nun universitet həyatı, incəsənət və mədəniyyət haqqında məlumatları daha müasir, dinamik və yaradıcı formatda təqdim edən virtual aparıcıları olacaq.

İncə və Sənət vasitəsilə universitetdə keçirilən tədbirlər, tələbə və müəllimlərin yaradıcılıq fəaliyyəti, yeni layihələr, maraqlı universitet xəbərləri, eləcə də incəsənətin müxtəlif istiqamətləri haqqında məlumatlar geniş auditoriyaya çatdırılacaq.

Virtual personajların fəaliyyətinin əsas məqsədi universitet kommunikasiyasını yeni nəsil rəqəmsal texnologiyalarla birləşdirmək və xüsusilə gənc auditoriya ilə daha innovativ kommunikasiya formatı yaratmaqdır.

İncə və Sənət yalnız universitet xəbərlərini təqdim edən virtual aparıcılar kimi deyil, həm də incəsənət dünyasına bələdçilik edən rəqəmsal personajlar kimi fəaliyyət göstərəcəklər. Onların təqdimatında teatr, kino, musiqi, təsviri sənət, mədəni irs və digər yaradıcılıq sahələri haqqında qısa, maraqlı və maarifləndirici kontentlər hazırlanacaq.

Layihə ADMİU-nun süni intellekt və rəqəmsal texnologiyaların təhsil, mədəniyyət və yaradıcılıq sahələrinə inteqrasiyası istiqamətində həyata keçirdiyi təşəbbüslər çərçivəsində reallaşdırılıb.

“İncə və Sənətin yaradılması bizim üçün sadəcə yeni texnologiyanın tətbiqi deyil. Bu layihə incəsənətin və universitet həyatının yeni kommunikasiya dili ilə təqdim olunmasıdır. Biz istəyirik ki, ADMİU-nun yaradıcılıq mühiti, tələbələrimizin və müəllimlərimizin fəaliyyəti daha geniş auditoriyaya daha dinamik və maraqlı şəkildə çatdırılsın. İncə və Sənət bu baxımdan universitetimizin rəqəmsal dünyadakı yeni simaları olacaq,” — deyə layihə ilə bağlı bildirilib.

İncə və Sənətin iştirakı ilə hazırlanacaq video və rəqəmsal kontentlər universitetin sosial media platformalarında və digər kommunikasiya kanallarında yayımlanacaq.

ADMİU bu layihə ilə incəsənət, təhsil və süni intellektin yaratdığı yeni imkanları bir araya gətirərək universitet kommunikasiyasında innovativ yanaşmanı inkişaf etdirməyi hədəfləyir.

İncəsənət artıq yalnız səhnədə, qalereyada və auditoriyada deyil — rəqəmsal dünyada da öz hekayəsini danışır. Bu hekayənin yeni simaları isə İncə və Sənətdir.