Yeni tədris ilinin başlanmasına sayılı günlər qaldığı bir vaxtda paytaxtda, xüsusilə məktəblərin yerləşdiyi ərazilərdə yol hərəkətinin təhlükəsizliyinin təmin olunması istiqamətində tədbirlər gücləndirilib.
Baki-baku.az xəbər verir ki, tədris ilinin başlaması ilə məktəblərin ətrafında nəqliyyat vasitələrinin və piyadaların hərəkət intensivliyinin artacağı nəzərə alınaraq, Dövlət Yol Polisi (DYP) və Azərbaycan Yerüstü Nəqliyyat Agentliyinin (AYNA) əməkdaşları tərəfindən həmin ərazilərdə yol şəraitinə nəzarət artırılıb.
Məktəblərin yerləşdiyi ərazilərdə yol hərəkətinin təşkili vəziyyəti araşdırılır, yol nişanları və nişanlanma xətləri yoxlanılır. Aşkar olunan çatışmazlıqların aradan qaldırılması istiqamətində müvafiq tədbirlər görülür.
Həmçinin məktəblərin qarşısındakı piyada keçidlərinin, yol nişanlarının və digər texniki vasitələrin vəziyyətinə xüsusi diqqət yetirilir.
Görülən tədbirlərin əsas məqsədi yeni tədris ili başlayarkən şagirdlərin məktəbə gediş-gəlişinin təhlükəsizliyini təmin etmək və təhsil müəssisələrinin ətrafında yol hərəkətinin daha təhlükəsiz təşkilinə nail olmaqdır.
