Berlində nəşr olunan nüfuzlu beynəlxalq rəqs jurnalı tanz kanadalı xoreoqraf və rəqqas Saşar Zərifi 2026-cı il üzrə xüsusi illik buraxılışında rəqs sənətinin inkişafına istiqamət verən 14 sənətçidən biri kimi təqdim edib.
Baki-baku.az xəbər verir ki, “Wegweisend” (“yol göstərən”) adlı xüsusi buraxılışda rəqs sənətində yeni yollar açan, fərqli yanaşmaları ilə yeni istiqamətlər formalaşdıran sənətçilərə yer verilib. Saşar Zərifin də bu siyahıya daxil edilməsi onun müasir rəqs sənətinə verdiyi töhfələrin beynəlxalq səviyyədə qiymətləndirilməsi kimi dəyərləndirilir.
Saşar Zərif Azərbaycan əsilli, Kanadada fəaliyyət göstərən dünyaşöhrətli xoreoqraf, rəqqas, tədqiqatçı və pedaqoqdur. O, öz yaradıcılığında sufi fəlsəfəsini, şamanizmin köklərini və Azərbaycanın klassik muğam sənətini müasir rəqs xoreoqrafiyası ilə birləşdirən özünəməxsus bir üslub yaradıb.
