“Binance” istifadəçilərinin səhm portfellərində ən böyük pay süni intellekt infrastrukturu və kvant texnologiyaları ilə məşğul olan şirkətlərə məxsusdur.
Baki-baku.az xəbər verir ki, “Binance Research”in iyun ayı üzrə hesabatına əsasən, platformada səhmlərə investisiya edən istifadəçilərin portfellərinin təxminən 25%-i süni intellekt infrastrukturu və hesablama gücü sahəsinə, 22%-i isə kvant hesablamaları istiqamətində fəaliyyət göstərən şirkətlərə yönəlib.
Hesabatda qeyd olunur ki, investorlar son dövrlərdə sürətlə bahalaşan yarımkeçirici istehsalçıları sektorunda həddindən artıq konsentrasiyadan qaçmağa üstünlük verirlər. Bunun əvəzinə portfellər daha geniş şəkildə şaxələndirilir.
Araşdırmaya görə, istifadəçilərin aktivlərinin 37%-i stablkoinlərdə saxlanılır. Analitiklər bunu investorların yüksək likvidliyi qorumaq və bazardakı dəyişkənlik fonunda riskləri daha ehtiyatlı idarə etmək istəyi ilə əlaqələndirirlər.
“Binance Research” hesab edir ki, bu göstəricilər pərakəndə investorların yalnız yüksək gəlirlilik deyil, həm də portfellərin davamlılığı və risklərin balanslaşdırılmasına daha çox diqqət yetirdiyini göstərir.
Bununla yanaşı, “Binance Research”in digər hesabatına görə, futbol üzrə dünya çempionatına həsr olunan proqnoz bazarlarında ticarət həcminin artması nəticəsində idman proqnoz platformalarında aylıq əməliyyatların ümumi dəyəri ilk dəfə 20 milyard ABŞ dollarını ötüb.
Hesabatda bildirilir ki, təkcə dünya çempionatı ilə bağlı proqnoz bazarlarında ticarət həcmi 5,4 milyard ABŞ dollarından çox olub. Bu göstərici idman proqnoz bazarları tarixində qeydə alınan ən yüksək aylıq nəticə hesab edilir.
Analitiklər vurğulayırlar ki, proqnoz platformalarının birja modeli ənənəvi bukmeker şirkətləri ilə müqayisədə əməliyyat xərclərini azaldır, kapitaldan daha səmərəli istifadə imkanı yaradır və istifadəçilərin platformalarda qalma müddətini artırır.
Hesabatda qeyd edilir ki, mövcud artım tempi qorunacağı təqdirdə, 2030-cu ilə qədər idman proqnoz bazarlarının illik həcmi 739 milyard ABŞ dollarına çata, iştirakçıların ümumi qənaəti isə 200 milyard ABŞ dollarını ötə bilər.
