Hər il iyunun 27-si dünyada Ümumdünya Balıqçılıq Günü kimi qeyd olunur. Bu əlamətdar gün balıqçılıq sahəsinin inkişafına diqqət çəkmək, su bioresurslarının qorunmasının vacibliyini vurğulamaq və balıqçılıq ənənələrini yaşatmaq məqsədi daşıyır.
Ümumdünya Balıqçılıq Günü 1984-cü ildə Romada keçirilən balıqçılığın tənzimlənməsi və inkişafına həsr olunmuş beynəlxalq konfransın qərarı ilə təsis edilib. Bayram ilk dəfə 1985-ci ildən etibarən qeyd olunmağa başlayıb və qısa müddətdə dünyanın bir çox ölkəsində geniş şəkildə qəbul olunub.
Bu günün əsas məqsədi balıq ehtiyatlarının qorunması, su hövzələrində ekoloji tarazlığın saxlanılması və balıqçılıq sahəsinin davamlı inkişafının təşviq edilməsidir. Həmçinin cəmiyyətin diqqəti dəniz və çaylarda yaşayan canlıların mühafizəsinə, qanunsuz balıq ovunun qarşısının alınmasına və təbii ehtiyatlardan səmərəli istifadəyə yönəldilir.
Ümumdünya Balıqçılıq Günü münasibətilə müxtəlif ölkələrdə balıq ovu yarışları, maarifləndirici seminarlar, ekoloji aksiyalar və sərgilər təşkil olunur. Bu tədbirlər peşəkar balıqçılarla yanaşı, həvəskarları da bir araya gətirərək təcrübə mübadiləsinə və sahənin inkişafına töhfə verir.
Azərbaycan da zəngin su ehtiyatlarına malik ölkələrdən biridir. Xəzər dənizi, Kür və Araz çayları, eləcə də çoxsaylı göllər və su anbarları ölkədə balıqçılığın inkişafı üçün geniş imkanlar yaradır. Bu səbəbdən Ümumdünya Balıqçılıq Günü ölkəmizdə də hər il diqqət mərkəzində olur.
Mütəxəssislərin fikrincə, son illərdə Azərbaycanda akvakultura sahəsinin inkişafı istiqamətində mühüm addımlar atılır. Kənd Təsərrüfatı Nazirliyinin Balıqçılıq və Akvakultura Mərkəzinin məlumatına görə, hazırda ölkədə əmtəəlik akvakultura məhsullarının illik istehsal həcmi təxminən 4000 ton təşkil edir. Lakin bu göstərici daxili tələbatın yalnız kiçik hissəsini ödəyir. Buna görə də 2030-cu ilə qədər akvakultura məhsulları istehsalının ən azı iki dəfə artırılması əsas hədəflərdən biri kimi müəyyənləşdirilib.
Bu məqsədə nail olmaq üçün dövlət tərəfindən bir sıra təşviq mexanizmlərinin tətbiqi nəzərdə tutulur. İstehsal həcminə bağlı subsidiyaların verilməsi, balıqçılıqda istifadə olunan avadanlıqların idxalına güzəştlərin tətbiqi, aqrar kredit və aqrar sığorta mexanizmlərinin yaradılması planlaşdırılan tədbirlər sırasındadır.
Eyni zamanda, akvakultura təsərrüfatlarının fəaliyyətinin rəsmiləşdirilməsi prosesinin sadələşdirilməsi, damazlıq balıq ehtiyatlarının artırılması və təbii su bioresurslarının bərpası istiqamətində də işlər aparılır. Bu məqsədlə mövcud müəssisələrin müasirləşdirilməsi və ölkənin müxtəlif bölgələrində yeni akvakultura komplekslərinin yaradılması nəzərdə tutulur.
Unutmamalıyıq ki, dənizlər, çaylar və göllər təkcə qida mənbəyi deyil, həm də gələcək nəsillərə qorunub çatdırılmalı olan qiymətli təbii sərvətdir. Balıq ehtiyatlarının mühafizəsi və səmərəli istifadəsi isə hər birimizin üzərinə düşən mühüm vəzifələrdən biridir.
