Özbəkistanın paytaxtı Daşkənd şəhərində “Musiqi təhsili: Qlobal miqyasda vahid məkana doğru” mövzusunda beynəlxalq forum çərçivəsində “Mədəniyyət təhsilində süni intellektin əhəmiyyəti” adlı beynəlxalq elmi-praktik konfrans keçirilib.
Bu barədə Baki-baku.az Azərbaycan Dövlət Mədəniyyət və İncəsənət Universitetindən məlumat (ADMİU) verilib.
Bildirib ki, forum çərçivəsində ADMİU nəzdində Humanitar Kollecin direktoru dosent Nərmin Qaralovanın rəhbərliyi ilə aparılan danışıqlar nəticəsində Yunus Rəcəbi adına Özbək Milli Musiqi Sənəti İnstitutu ilə ADMİU nəzdində Humanitar Kollec arasında rəsmi əməkdaşlıq memorandumu imzalanıb.
Memorandum müəllim və tələbələrin beynəlxalq təcrübə mübadiləsi, birgə elmi-metodik layihələrin həyata keçirilməsi, ustad dərsləri, konsert və festivalların təşkili baxımından mühüm əhəmiyyət daşıyır.
Forum çərçivəsində keçirilən beynəlxalq elmi-praktik konfransda Nərmin Qaralova “Milli kimliyin qorunub saxlanılması və mədəniyyətlərarası inteqrasiyanın inkişafı faktoru kimi musiqi təhsili” mövzusunda məruzə ilə çıxış edib. Məruzə forum iştirakçıları tərəfindən maraqla qarşılanıb və forumun elmi toplusunda da nəşr olunub.
Beynəlxalq forumda fəal elmi iştirakına və akademik əməkdaşlığın inkişafına verdiyi töhfələrə görə Nərmin Qaralova Özbəkistan Respublikası Ali Təhsil, Elm və İnnovasiyalar Nazirliyi, Mədəniyyət Nazirliyi və Özbəkistan Dövlət Sənət və Mədəniyyət İnstitutu tərəfindən xüsusi sertifikatlarla təltif olunub. Həmçinin ona musiqi təhsilinin inkişafı, innovativ metodların təşviqi və müasir elmi-mədəni dialoqa verdiyi töhfələrə görə Özbəkistan Respublikasının mədəniyyət naziri Ozodbek Nazarbekov tərəfindən imzalanmış beynəlxalq sertifikat təqdim edilib.
