Qarın “yanması” ifadəsi ilk baxışda bir az qəribə səslənir, çünki “yanmaq” adətən istiliklə əlaqələndirilir. Halbuki çox soyuq havalarda dərinin qarla uzunmüddətli təması nəticəsində yaranan “soyuq yanığı” həqiqətən də isti yanığına bənzər bir təsir göstərir.

Baki-baku.az xəbər verir ki, bu zaman dəridə qızartı, ağrı, hətta qabarcıqlar əmələ gələ bilər.
Hadisənin səbəbi fiziki cəhətdən sadədir. Qar bədənlə təmasda olduqda istilik enerjisi sürətlə bədəndən ətrafa ötürülür. Bu ani istilik itkisi dəridəki hüceyrələrin donmasına və zədələnməsinə gətirib çıxarır. Hüceyrələrdəki su kristallaşır, bu da onların normal fəaliyyətini pozur. Nəticədə toxumalar “donur” və insan isti yanığında olduğu kimi ağrı hiss edir.

Xüsusilə uşaqlar, yaşlı insanlar və qan dövranı zəif olan şəxslər bu vəziyyətə daha həssasdırlar. Qarı əlcək və ya qoruyucu vasitə olmadan əllə tutmaq, uzun müddət açıq dərinin üzərinə qarın düşməsinə imkan vermək belə soyuq yanığına səbəb ola bilər.

Soyuq yanığı adətən üç mərhələdə özünü göstərir. Əvvəlcə dəridə iynə batması kimi hiss, sonra ağrı və keylik, sonda isə toxuma zədələnməsi baş verir. Əgər bu vəziyyət uzun sürərsə, “donvurma” adlanan daha ağır nəticə də ortaya çıxa bilər.

Belə hallarda ən doğru davranış dərini birdən-birə isti suya salmaq deyil, yavaş-yavaş isinməsini təmin etməkdir. İstiliyin ani artması zədələnmiş hüceyrələrə əlavə zərər vura bilər. Ən yaxşısı, bədəni isti geyimlə bürümək və tədricən normal temperaturun bərpasına imkan verməkdir.