Cənubi Koreya və ABŞ-dan olan alimlər zədələnmiş sümük hissələrinin bədənin daxilində birbaşa “çap” edilməsinə imkan verən innovativ cihaz hazırlayıblar.

Baki-baku.az xəbər verir ki, texnologiya ilk mərhələdə dovşanlar üzərində sınaqdan keçirilib və nəticələr nüfuzlu “Device” elmi jurnalında dərc olunub.

Məlumata görə, cihaz davamlı polimer materialların kompoziti və sümük toxumasının mineral hissəsinin sintetik analoqundan istifadə etməklə yeni sümük strukturlarını formalaşdırır.

Yığcam ölçülərə malik bu qurğu 3D çap sisteminin analoqu kimi işləyir. Onun əllə idarə olunması cərrahlara əməliyyat zamanı çapın istiqamətini, bucağını və dərinliyini dəqiq tənzimləməyə imkan verir. Prosedur cəmi bir neçə dəqiqə çəkir və əlavə hazırlıq tələb etmir.

Alimlərin fikrincə, bu texnologiya gələcəkdə sümük sınıqlarının və ciddi zədələrin bərpasında inqilabi rol oynaya bilər.