Mina təhlükəsi təkcə Azərbaycanda deyil, dünyanın müxtəlif ölkələrində bərpa və yenidənqurma proseslərini ləngidən, inkişaf imkanlarını məhdudlaşdıran və insanların təhlükəsizliyini risk altında saxlayan əsas problemlərdən biridir.
Baki-baku.az xəbər verir ki, bu fikirləri Vüqar Süleymanov Bakıda keçirilən World Urban Forum 13 çərçivəsində Azərbaycan Pavilyonunda təşkil olunan “Münaqişədən sonrakı şəhərlərdə yenidənqurma: Humanitar minatəmizləmə fəaliyyətinin kritik rolu” mövzusundakı tədbirdə çıxışı zamanı səsləndirib.
O qeyd edib ki, məhz buna görə də belə platformalar xüsusi əhəmiyyət daşıyır. Onun sözlərinə görə, mina probleminin həlli yalnız milli səviyyədə aparılan fəaliyyətlərlə kifayətlənmir, eyni zamanda davamlı beynəlxalq dəstək, tərəfdaşlıq, innovativ yanaşmalar və qabaqcıl təcrübələrin paylaşılmasını tələb edir.
Vüqar Süleymanov vurğulayıb ki, 2020-ci ildə Vətən müharibəsinin başa çatmasından sonra Azərbaycan bu istiqamətdə genişmiqyaslı tədbirlər həyata keçirib. O bildirib ki, 2020-ci ilin noyabr ayından indiyədək 270 min hektardan çox ərazi mina və partlamamış hərbi sursatlardan təmizlənib, 250 mindən artıq mina və partlamamış döyüş sursatı aşkar edilərək zərərsizləşdirilib.
