Payız və qış aylarında havaların soyuması ilə yanaşı avtomobil sahiblərinin qarşılaşdığı əsas məsələlərdən biri də şinlərə düzgün qulluqdur.
Baki-baku.az-ın məlumatına görə, mütəxəssislərin fikrincə, düzgün istifadə və vaxtında texniki baxım sürücülərin həm təhlükəsizliyini artırır, həm də şinlərin ömrünü uzadır.
Soyuq hava zamanı havanın sıxlığı dəyişir və nəticədə təkərlərdəki təzyiq azalır. Bu isə avtomobilin yolda sürüşmə riskini artırır, yanacaq sərfiyyatını çoxaldır. Buna görə də sürücülər həftədə azı bir dəfə şin təzyiqini yoxlamalıdır.
Qış şinlərinin rezin tərkibi soyuğa davamlı olur və yollarda sürüşmənin qarşısını alır. Yay şinləri isə şaxtada bərkiyir və dartma gücünü itirir. Bu səbəbdən +7 dərəcədən aşağı havalarda mütləq qış şinlərinə keçid edilməlidir.
Şin protektorlarının dərinliyi qış mövsümündə xüsusi əhəmiyyət daşıyır. Protektor dərinliyi 4 mm-dən az olduqda, şinlər sürüşkən yollarda təhlükəsizlik təmin etmir.
Soyuq aylarda yollarda istifadə edilən duz və kimyəvi maddələr şinlərin və disklərin səthinə zərər verir. Buna görə təkərlərin yuyulması həm təhlükəsizlik, həm də uzunömürlülük baxımından vacibdir.
Sürücülərin ən çox diqqətdən qaçırdığı məqam ehtiyat təkərdir. Soyuq havalarda o da əsas şinlər kimi yoxlanmalı və lazımi təzyiqdə saxlanılmalıdır.
Bununla yanaşı, hazırda Bakıda təkərlərin qiyməti ölçülərə görə 60 AZN-dən başlayaraq 150 AZN-ə qədər dəyişir. Sürücülər üçün həm təhlükəsizlik, həm də büdcəyə uyğun seçim etmək üçün bazarı düzgün araşdırmaq vacibdir.
Mütəxəssislər xəbərdarlıq edir ki, şinlərə laqeyd yanaşmaq yalnız avtomobilin texniki vəziyyətini deyil, sürücülərin həyatını da riskə atır. Ona görə də hər bir sürücü qış mövsümündə bu qaydalara əməl etməklə yollarda təhlükəsizliyini təmin etmiş olar.
