Sabah göy üzündə nadir astronomik hadisə – “Qara Ay” müşahidə olunacaq.

Baki-baku.az xəbər verir ki, bu barədə məlumatı Britaniyanın “Daily Mail” nəşri yayıb. Astronomların sözlərinə görə, bu hadisə ay təqvimi üzrə bir ayda ikinci dəfə yeni ayın baş verməsi ilə xarakterizə olunur.

Adətən yeni ay zamanı Ay Yer ilə Günəşin arasından keçdiyi üçün, onun Yerə baxan üzü tam kölgədə qalır və adi gözlə görünmür. Amma bu dəfəki yeni ay “Qara Ay” adını alır, çünki təqvim ayı ərzində ikinci dəfə baş verir – bu isə çox nadir hallarda müşahidə olunur.

Bəzi inanclı insanlar bu hadisəni Əhdi-Cədidin “Günəş tutulacaq, Ay işıq saçmayacaq” kimi dini istinadlarla əlaqələndirsə də, alimlər bildirirlər ki, bunun heç bir təhlükəli və mistik tərəfi yoxdur – bu, tamamilə təbiətin dövri qanunauyğunluqları ilə bağlıdır.

“Qara Ay”ın bu dəfəki mərhələsi 2025-ci il avqustun 22-nə təsadüf edəcək. Qeyd edək ki, bu fenomen təxminən hər 33 ayda bir dəfə baş verir. Növbəti “Qara Ay” isə 2028-ci il avqustun 20-də baş verəcək.