Mikro və kiçik sahibkarlıq subyektlərinin məhsullarının satışına dəstək olmaq, eləcə də istehlakçıları birbaşa kənd təsərrüfatı və qida məhsullarının istehsalçıları ilə əlaqələndirmək məqsədilə martın 5-dən etibarən “KOB bazar” satış yarmarkasına start verilir.
Bu barədə Baki-baku.az İqtisadiyyat Nazirliyinin tabeliyindəki Kiçik və Orta Biznesin İnkişafı Agentliyinə (KOBİA) istinadən xəbər verir.
Bildirilib ki, yarmarka Bakının Binəqədi rayonunda Koroğlu və Əcəmi Naxçıvani küçələrinin kəsişməsində yerləşir. Bazar Novruz və Ramazan bayramları günlərində hər gün, digər günlərdə isə həftəsonu fəaliyyət göstərəcək. Yarmarkada Abşeron və ölkənin digər bölgələrində istehsal olunan kənd təsərrüfatı və qida məhsullarının satışı həyata keçiriləcək.
“KOB bazar”ın üstünlükləri təzə və keyfiyyətli kənd təsərrüfatı və qida məhsulları, məhsulları birbaşa istehsalçıdan almaq, ucuz və sərfəli qiymət, həmçinin KOB-ların məhsullarının satışına dəstək verməkdir.
Qeyd edək ki, “KOB bazar” satış yarmarkası KOBİA-nın təşkilatçılığı ilə, dövlət dəstəyi hesabına fəaliyyət göstərəcək.