Payız mövsümündə soyuqdəymədən qorunmaq üçün C vitamini və digər qida əlavələrinə üz tutanların sayı artır.
Baki-baku.az xəbər verir ki, həkimlərin sözlərinə görə, bu yanaşma göründüyü qədər effektiv deyil.

Avropa Tibb Mərkəzinin terapevti, professor Svetlana Kanevskaya “Gazeta.ru”ya açıqlamasında bildirib ki, C vitamininin nəzarətsiz istifadəsi nə soyuqdəymənin qarşısını alır, nə də xəstəliyin gedişatını yüngülləşdirir.

Onun sözlərinə görə, C vitamini immun sisteminə yalnız normal konsentrasiyada fayda verir. Artıq dozalar isə əksinə, orqanizmə zərər vura bilər: qaraciyər və böyrəklərin yüklənməsi, vitamin-mineral balansının pozulması, hətta böyrək daşı riskinin artması mümkündür. Çünki askorbin turşusu bədəndə oksalata çevrilir və bu maddə kalsiumla birləşərək kristallar əmələ gətirə bilir.

Kanevskaya vurğulayıb ki, sağlam immunitetin formalaşması uzunmüddətli prosesdir və bunun əsasında düzgün yuxu rejimi, balanslı qidalanma, fiziki aktivlik, stressin idarə olunması və xroniki xəstəliklərə nəzarət dayanır:
“Bir neçə gün ərzində qəbul edilən “möcüzəvi” vitaminlər immuniteti gücləndirə bilməz”.