Nəqliyyat dəhlizləri, infrastruktur və şəhərsalma inkişafı bir-biri ilə sıx şəkildə əlaqəlidir. Müasir nəqliyyat şəbəkələri məskunlaşma proseslərinə, sənaye inkişafına, əmək bazarında mobilliyə, investisiya istiqamətlərinə, mənzil ehtiyaclarına və iqlim dayanıqlılığına eyni vaxtda təsir göstərir.

Baki-baku.az xəbər verir ki, bu fikirləri Ceyhun Bayramov World Urban Forum 13 çərçivəsində keçirilən “Əlaqələndirmənin mərkəzində şəhərlər: şəhər yenidənqurması və regional əməkdaşlıq” adlı tədbirdə çıxışı zamanı bildirib.

Nazir qeyd edib ki, planlı və davamlı şəkildə inkişaf etdirilən şəhərlər uzunmüddətli iqtisadi və sosial faydaların əldə olunması baxımından xüsusi əhəmiyyət daşıyır.

Onun sözlərinə görə, Azərbaycan azad edilmiş ərazilərdə genişmiqyaslı yenidənqurma və bərpa layihələri həyata keçirir. C.Bayramov vurğulayıb ki, şəhər, qəsəbə və kəndlər davamlı inkişaf, “ağıllı” idarəetmə, yaşıl enerji, iqlim dayanıqlılığı və insan mərkəzli şəhərsalma prinsipləri əsasında yenidən formalaşdırılır.