Böyük Britaniya hökuməti ölkədəki quraqlığı “ölkə miqyasında fövqəladə hadisə” elan edib və su istehlakını azaltmaq üçün bir sıra tədbirlər açıqlayıb. Bu tədbirlər arasında — köhnə elektron məktubların və şəkillərin silinməsi də var. Səlahiyyətli şəxslərin sözlərinə görə, məlumat mərkəzlərinin soyudulması üçün çoxlu miqdarda su sərf olunur, bu səbəbdən arxiv məlumatların saxlanılması əlavə yük yaradır.
Baki-baku.az xəbər verir ki, Böyük Britaniya Ətraf Mühitin Mühafizəsi Agentliyi ölkənin böyük hissəsini əhatə edən şiddətli quraqlıq barədə məlumat yayıb. Su anbarları dolmur, bir çox yerlərdə səviyyə kəskin şəkildə aşağı düşüb. Bu vəziyyətə görə hökumət vətəndaşlara suya qənaət etməyə yönəlmiş tövsiyələr təqdim edib.
Sənədlərdə deyilir:
“Adi gündəlik vərdişlər, məsələn, kranı söndürmək və ya köhnə e-mailləri silmək, ümumi su tələbatını azaltmaq və çaylarımızın və təbiətin sağlamlığını qorumaq üçün birgə səylərə həqiqətən dəstək olur”.
Agentlik bildirir ki, bu çağırışlar müəyyən təsir göstərib — su istehlakı 20% azalıb.
Lakin sosial şəbəkə istifadəçiləri bu tövsiyəni kəskin tənqid ediblər. Onların fikrincə, məktub və foto silmək su sərfiyyatına ciddi təsir etmir, çünki məlumatların saxlanması zamanı əsas su itkisi deyil, prosesor və videokartların işləməsi zamanı baş verən istilik yayılması və onun soyudulması əsas rol oynayır.
Üstəlik, bəzi ekspertlər bildirir ki, arxivlərin silinməsi əks effekt verə bilər, çünki silmə əməliyyatı özü də əlavə enerji və hesablama gücü tələb edir — bu da nəticə etibarilə daha çox enerji və su sərfi deməkdir. Həm də britaniyalı istifadəçilərin məlumatları xarici ölkələrdə saxlanıla bilər, bu da silinmə tövsiyəsini məntiqsiz edir, çünki Britaniyada suya qənaətə heç bir təsir göstərmir.
Ev şəraitində suya necə qənaət etmək olar:
Yağış sularını toplamaq üçün xüsusi çən quraşdırın və bu suyu bağda suvarma üçün istifadə edin
Axan tualeti təmir edin — bu cür sızmalar gündə 200–400 litr su itkisiylə nəticələnə bilər
Mətbəxdə istifadə etdiyiniz suyu bitkiləri sulamaq üçün toplayın
Qazonu sulamaqdan imtina edin — saralmış ot zamanla öz-özünə bərpa olunur
Diş fırçalayarkən və ya təraş olarkən suyu söndürün
Duş qəbul etmə vaxtını azaldın
Köhnə e-mailləri və şəkilləri silin, çünki məlumat mərkəzlərinin soyudulması üçün böyük həcmdə su sərf olunur
Hazırda İngiltərənin beş bölgəsi rəsmi olaraq quraqlıq zonası elan edilib, daha altı bölgə isə uzunmüddətli yağıntısız hava şəraiti ilə üz-üzədir. Bu, ölkədə 1976-cı ildən bəri ən quraq 6 aylıq dövrdür — yanvar–iyul ayları arasında rekord dərəcədə az yağıntı düşüb. Çay və su anbarlarındakı su səviyyəsi davamlı olaraq azalır, və avqust ayında da yağış gözlənilmir.
Hacı Cavadov
