Elm adamları “Ceyms Vebb” kosmik teleskopunun köməyi ilə Yerə bənzər planetlərin necə formalaşdığına dair yeni ipucları əldə ediblər. Bu dəfə araşdırmanın mərkəzində kainatın ən möhtəşəm görüntülərindən biri — NGC 6302, digər adı ilə Kəpənək planetar dumanlığı dayanır.

Baki-baku.az xəbər verir ki, təxminən 3400 işıq ili uzaqlıqda yerləşən bu nəhəng struktura dair məlumatlar “Monthly Notices of the Royal Astronomical Society” elmi jurnalında dərc olunub.

Alimlər dumanlığın mərkəzində Yer kimi sərt səthə malik planetlərin formalaşmasına səbəb olan əsas komponentləri aşkarlayıblar. Bu komponentlər əsasən üzvi maddələr və minerallardan ibarət mikroskopik toz hissəcikləridir.

Mütəxəssislər bildirirlər ki, bu cür tozlar kosmosda planetlərin təməlini təşkil edir və milyonlarla il ərzində birləşərək, daha böyük cisimlər — nəticədə planetlər yaradır.

Tədqiqatçılar bu tapıntını planetlərin mənşəyini anlamaq yolunda əhəmiyyətli bir irəliləyiş hesab edirlər. Nəticələr göstərir ki, bizim Günəş sistemindəki planetlərin, o cümlədən Yerin də yaranması bu universal prosesin bir hissəsi ola bilər.