Urbanizasiyanıın qlobal miqyasda sürətləndiyi bir vaxtda davamlı və dayanıqlı şəhərlərin əhəmiyyəti daha da artacaq.

Baki-baku.az xəbər verir ki, bunu Azərbaycan Prezidentinin iqlim məsələləri üzrə nümayəndəsi Muxtar Babayev Birləşmiş Millətlər Təşkilatının Ümumdünya Şəhərsalma Forumunun 13-cü Sessiyası (WUF13) çərçivəsində “Azərbaycanın ilk milli davamlılıq standartının hazırlanması: Davamlı təcrübələr standartı (SPS)” mövzusunda sessiyada videomüraciətlə çıxışı zamanı deyib.

“Birləşmiş Millətlər Təşkilatının məlumatına görə, 2050-ci ilə qədər əlavə 2,5 milyard dünya əhalisinin şəhər yerlərində yaşaması gözlənilir ki, bu artımın təxminən 90 faizi də Asiya və Afrikanın payına düşür. Bu isə bugünkü müzakirəni təkcə Azərbaycan üçün deyil, həm də daha geniş beynəlxalq ictimaiyyət üçün xüsusilə aktual edir.

Bugünkü sessiyanın işində hamınıza uğurlar arzulayıram və ümid edirəm ki, onun nəticələri Azərbaycanda və onun hüdudlarından kənarda daha güclü dayanıqlılıq təcrübələrinə, daha sıx əməkdaşlığa və daha dayanıqlı şəhər inkişafının modellərinə töhfə verəcək”, – deyə M.Babayev qeyd edib.