Gündəlik həyatda yol verdiyimiz bəzi yanlış işıqlandırma vərdişləri həm gözlərin sağlamlığına, həm də yuxu rejiminə ciddi təsir göstərir.

Baki-baku.az bu barədə Gazeta.ru-ya istinadən xəbər verir.
Rusiyanın Perm Milli Tədqiqat Politexnik Universitetinin dosenti Lüdmila Vedeneyevanın sözlərinə görə, oxuma, yazı və monitor qarşısında iş zamanı yaranan görmə yüklənməsi, həmçinin zəif və kəskin dəyişən işıqlandırma göz yorğunluğuna və diqqət azalmasına səbəb olur. Bu zaman mətnlərdə səhvlər 25%-ə qədər artır.

Vedeneyeva düzgün işıqlandırma üçün “dimmer” adlı qurğudan istifadəni tövsiyə edir. Bu cihaz işığın parlaqlığını saniyədə 100 dəfə tənzimləyir və daha rahat işıq mühiti yaradır. Axşam saatlarında isə (18:00-20:00 arası) işıq səviyyəsi gündüz işığının 50-70%-nə qədər azaldılmalıdır.

“İşıq mənbələrinin düzgün yerləşdirilməsi də vacibdir – tavan lampası əvəzinə diffuz tavan işığı və iş masasına yönəldilmiş stolüstü lampa seçilməlidir. İşığın birbaşa gözə və ekrana düşməsi yolverilməzdir. Kompüter qarşısında çalışanlara monitor arxasına LED işıqlandırma quraşdırmaq və ekranı pəncərəyə perpendikulyar yerləşdirmək tövsiyə olunur”, – deyə o bildirib.

Mütəxəssis, həmçinin qadcet ekranlarından yayılan mavi işığın axşam saatlarında melatonin hormonunun ifrazını azaltdığını və yuxu pozuntularına səbəb olduğunu vurğulayıb. Bu təsirin qarşısını almaq üçün mavi işığı filtrləyən eynəklər və ekran filtrlərindən istifadə tövsiyə olunur. Onlar zərərli işığın 70-90%-ni bloklaya bilir.