Azərbaycanda dayanıqlı şəhərsalma siyasətinin tərkib hissəsi olaraq gənclərin inkişafına xüsusi önəm verilir.

Xüsusilə Şuşa və Lənkəran kimi bölgələrdə gənclərin potensialının artırılmasına yönəlmiş proqramlar geniş miqyasda icra olunur.

Baki-baku.az xəbər verir ki, bu fikirləri gənclər və idman nazirinin müavini Fərhad Hacıyev BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində təşkil olunan Uşaq və Gənclər Assambleyasında çıxışı zamanı səsləndirib.

O qeyd edib ki, belə mötəbər beynəlxalq platformada gənclərin əsas müzakirələrin mərkəzində yer alması xüsusi qürur hissi doğurur.

Nazir müavini vurğulayıb ki, əsas məqsəd gənclər və uşaqlar üçün sabit həyat şəraiti, keyfiyyətli təhsil və təhlükəsiz yaşayış imkanlarının təmin olunmasıdır. Onun sözlərinə görə, dünyada milyonlarla uşaq və gənc hələ də mənzil, təhsil və digər əsas imkanlardan məhrum şəraitdə yaşayır.

“Qarabağ və Şərqi Zəngəzurda biz təkcə yollar və infrastruktur inşa etmirik, eyni zamanda gənclər üçün yeni imkanlar, inkişaf perspektivləri və daha əlverişli yaşayış mühiti yaradırıq. Azərbaycan postmünaqişə dövründə 9 şəhərin yenidən qurulmasını həyata keçirərək dayanıqlı və inklüziv gələcək formalaşdırmağa çalışır”, – deyə Fərhad Hacıyev bildirib.