Ümumdünya Şəhərsalma Forumunun 13-cü Sessiyası (WUF13) çərçivəsində “Sea Breeze” pavilyonunda “Ecosphere” sosial və ekoloji mərkəzi ilə birgə təşkil edilən “Uşaqlar və gənclər arasında yaşıl startaplar” layihəsinin qaliblərinin mükafatlandırma mərasimi keçirilib.

Baki-baku.az xəbər verir ki, bunu “Agalarov Development” şirkətinin prezidenti Emin Ağalarov elan edib.

Onun sözlərinə görə, proqram 6 yaşdan tələbəlik dövrünə qədər uşaqları və gəncləri bir araya gətirib, gələcəyin ekoloji cəhətdən təmiz şəhəri və kurortu üçün vizyonu inkişaf etdirməyə yönəlib.

“İştirakçılar təxminən 50 startapı təmsil ediblər. Proqram təxminən üç ay sürüb və “Winter Lab” və “Spring Lab”ı əhatə edib. Uşaqlar şəhərsalma, urbanizm və ekologiya üzrə mentorlar və mütəxəssislərlə birlikdə müasir dayanıqlı şəhər haqqında öz vizyonları üzərində işləyiblər”, – deyə Emin Ağalarov qeyd edib.

O, müsabiqədən sonra 12 finalçının seçildiyini açıqlayıb. Əvvəlcədən bir baş mükafat sahibinin seçilməsi planlaşdırılırdı, lakin sonda üç qalib seçilib.

“Ən əsası odur ki, bunlar yalnız kağız üzərində qalacaq uşaq ideyaları deyil. Qalib gələn üç layihə “Sea Breeze”də həyata keçiriləcək”, – deyə sahibkar vurğulayıb.

Qalib layihələrə “uşağın gözü ilə” dizayn edilmiş oyun meydançası, interaktiv piyada oyun sahəsi olan uşaqlar üçün dayanıqlı və ekoloji cəhətdən təmiz şəhər haqqında təhsil proqramı və əlilliyi olan uşaqların və digər azyaşlıların birlikdə vaxt keçirib istirahət edə biləcəyi inklüziv oyun meydançası daxildir.

Müsabiqə qaliblərinə diplomlar, hədiyyələr və pul mükafatları təqdim olunub.

Tədbir zamanı Emin Ağalarov, həmçinin “Sea Breeze” stendini gəzib, forum iştirakçıları ilə ünsiyyət qurub və pərəstişkarları ilə şəkil çəkdirib.