Azərbaycanın Milli Qəhrəmanı, igid döyüşçü Mübariz İbrahimovun şəhid olmasından 16 il ötür. Adı qəhrəmanlıq, vətən sevgisi və fədakarlıq anlayışları ilə yanaşı çəkilən Mübariz İbrahimov təkcə bir hərbçi deyil, bütöv bir nəslin vətənpərvərlik simvoluna çevrilmiş şəxsiyyətdir.
1988-ci il fevralın 7-də Biləsuvar rayonunun Əliabad kəndində dünyaya göz açan Mübariz Ağakərim oğlu İbrahimov uşaqlıq illərindən vətənə bağlılığı, iradəsi və qətiyyəti ilə seçilirdi. O, 2005-ci ildə şəhid M.Piriyev adına Əliabad kənd orta məktəbini bitirdikdən sonra hərbi xidmətə yollanıb.
Həqiqi hərbi xidmətini Daxili Qoşunların Xüsusi Təyinatlı Bölüyündə keçirən Mübariz 2007-ci ildə çavuş rütbəsində ordudan tərxis olunsa da, hərbçi peşəsindən uzaq qala bilmədi. Bir müddət mülki sahədə çalışdıqdan sonra 2009-cu ilin avqustunda yenidən xidmətə qayıtdı və gizir rütbəsində Azərbaycan Ordusunun sıralarında fəaliyyətini davam etdirdi. Onun ən böyük arzusu ön xəttdə xidmət etmək idi və bu məqsədlə könüllü olaraq cəbhə bölgəsinə yollandı.
Azərbaycan hərb tarixinin ən parlaq qəhrəmanlıq səhifələrindən biri məhz 2010-cu ilin iyunun 18-dən 19-na keçən gecə yazıldı. Tərtərin Çaylı istiqamətində baş verən döyüş zamanı Mübariz İbrahimov təkbaşına düşmən mövqelərinə doğru hərəkət etdi. Bir kilometrlik minalanmış ərazini keçərək Ermənistan silahlı qüvvələrinin mövqelərinə daxil olan Azərbaycan əsgəri qəfil hücumla çoxsaylı düşmən hərbçisini zərərsizləşdirdi.
Düşmənin silahlarını özünə qarşı istifadə edən Mübariz saatlarla davam edən qeyri-bərabər döyüşdə misilsiz şücaət nümayiş etdirdi. O, təkbaşına düşmənə ciddi itkilər verdirərək onların müdafiə xəttindəki zəif nöqtələri üzə çıxardı.
Təxminən beş saat davam edən döyüşdən sonra qəhrəman döyüşçü şəhid oldu, lakin göstərdiyi rəşadət həm Azərbaycan cəmiyyətində, həm də orduda böyük əks-səda doğurdu.
Şəhidin qəhrəmanlığı qədər onun nəşi ətrafında yaşanan hadisələr də yaddaşlara həkk olundu.
Ermənistan tərəfi Mübariz İbrahimovun nəşini uzun müddət Azərbaycana qaytarmaqdan imtina etdi və onu 141 gün saxladı. Yalnız Azərbaycan, Rusiya və Ermənistan prezidentlərinin Həştərxan görüşündən sonra şəhid gizirin və baş leytenant Fərid Əhmədovun nəşləri Azərbaycana təhvil verildi.
2010-cu il noyabrın 7-də Müdafiə Nazirliyinin Təlim-Tədris Mərkəzində Mübariz İbrahimovla vida mərasimi keçirildi. Həmin gün minlərlə insan son mənzilə yola salmaq üçün toplaşdı. Qəhrəman döyüşçü Bakıdakı II Fəxri xiyabanda dəfn edildi.
Mübariz İbrahimovun göstərdiyi misilsiz igidlik dövlət tərəfindən də yüksək qiymətləndirildi.
Azərbaycan Prezidenti, Ali Baş Komandan İlham Əliyevin sərəncamı ilə ona ölümündən sonra ölkənin ən ali fəxri adı olan “Azərbaycanın Milli Qəhrəmanı” adı verildi. Eyni zamanda, qəhrəmanın xatirəsinin əbədiləşdirilməsi istiqamətində bir sıra addımlar atıldı, onun adı küçələrə, təhsil müəssisələrinə verildi, haqqında kitablar yazıldı, filmlər çəkildi.
Bu gün Mübariz İbrahimovun adı Azərbaycan xalqının yaddaşında qorxmazlıq və vətən sevgisinin rəmzi kimi yaşayır. Onun göstərdiyi qəhrəmanlıq illər sonra başlanan Vətən müharibəsində döyüşən minlərlə Azərbaycan əsgəri üçün ilham mənbəyinə çevrildi. Mübariz sübut etdi ki, Vətən sevgisi bəzən bir insanın iradəsində bütöv bir ordunun gücünü cəmləşdirə bilir.
Şəhidliyindən 16 il keçsə də, Mübariz İbrahimovun adı Azərbaycan tarixinin qəhrəmanlıq salnaməsində xüsusi yerini qoruyur. O, təkcə bir döyüşün qəhrəmanı deyil, xalqın qürur mənbəyinə çevrilmiş əbədi bir simvoldur.
