Ötən ayın sonlarında Bakının Sabunçu rayonun Bilgəh qəsəbəsində çöl quşları kütləvi şəkildə tələf olub.
Məsələ ilə bağlı Baki-baku.az Azərbaycan Qida Təhlükəsizlik Agentliyinə (AQTA) sorğu göndərib.
Agentlikdən bildirilib ki, AQTA tərəfindən əlaqədar qurumların müraciəti əsasında quş cəsədlərindən nümunələr götürülərək laborator müayinələrə cəlb edilib. Aparılan sınaqların nəticələrinə əsasən, hər hansı xüsusi heyvan xəstəliyi halı aşkar edilməyib.
Qeyd edilib ki, AQTA-nın səlahiyyətində olan məsələ ölümün hansısa heyvan xəstəliyindən olub-olmamasını müəyyən etməkdir. AQTA mütəxəssisləri tərəfindən Ekologiya və Təbii Sərvətlər Nazirliyinin və Kənd Təsərrüfatı Nazirliyinin əməkdaşlarının iştirakı ilə ölmüş quşlardan nümunələr götürülür. İndiyədək aparılan təhqiqatların nəticələrinə, əsasən quşların ölüm səbəbinin heyvan xəstəliyinin olmadığı müəyyən edilib. Quşların ölüm səbəbini digər qurumlardan dəqiqləşdirə bilərsiniz.
